Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 465 Hüküm no: 620 Orijinal metin no: [80a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Doğramacı Pedros v. Artin’in, ortağı Avanis v. Arzuman’daki alacağına kefil olan Doğramacı Usta Ahmed b. Ali’nin borcu Pedros’a ödemesi Ma‘rûz Doğramacı tâifesinden arzuhâl sahibi Pedros v. Artin zimmî Dergâh-ı âlî dîvân çavuşlarından es-Seyyid Ahmed Çavuş kulları mübâşeretiyle Mahkeme-i Bâb’da meclis-i şer‘a ihzâr ettirdiği Doğramacı Usta Ahmed b. Ali muvâcehesinde derûn-ı arzuhâlde mezkûr şerîki Doğramacı Avanis v. Arzuman zimmî hazır olduğu hâlde merkūm Avanis ile târih-i i‘lâmdan yedi ay mukaddem fesh-i akd-i şirket edip mahmiye-i İstanbul’da Sultan Mehmed Han Câmi‘-i şerîfi kurbünde merkūm Avanis’in dükkânında huzûr-ı Müslimînde merkūm Avanis ile hesâbımızı gördüğümüzde mal-ı şirketden merkūm Avanis zimmetinde seksen guruş hakkım zuhûr ettikde ol dahi meblağ-ı mezbûr seksen guruş bana deyni olduğunu ba‘de’l-ikrâr meblağ-ı mezbûr seksen guruş hakkıma mezbûr Usta Ahmed bi’l-emr ve’l-kabûl kefîl olmağın binâenaleyh meblağ-ı mezbûru merkūm Usta Ahmed’den taleb ederim deyü ba‘de’d-da‘vâ ve’l-inkâr merkūm Pedros müdde‘âsını lede’t-tezkiye adâletleri zâhir olan tâife-i mezkûreden es-Seyyid Ali b. Abidin ve Mehmed b. Osman şehâdetleriyle isbât etmeğin mûcebince meblağ-ı mezbûr seksen guruşu bi-hükmi’l-kefâle mezbûr Pedros’a edâ ve teslîme mezbûr Usta Ahmed’e tenbîh olundukdan sonra mezbûr Usta Ahmed dahi meblağ-ı mezkûru târih-i i‘lâmdan üç gün tamamında edâya ta‘ahhüd etmekle merkūm Pedros dahi râzı olduğu huzûr-ı âlîlerine i‘lâm olundu. Fî 10 Rebî‘ülevvel sene 1163