Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 466 Hüküm no: 621 Orijinal metin no: [80a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tablakâr Panço v. Metro’nun, kendisine sattığı tablayı geri alan Nikola v. Yuvan’a ödediği bedelin geri verilmesi talebiyle açtığı davayı ispat edemediği Ma‘rûz İstanbul’da Acımusluk kurbünde vâki‘ ekmekçi fırınının tablakârlarından Panço v. Metro nâm zimmî Bâb Mahkemesi’nde meclis-i şer‘de Muhzır Yusuf mübâşeretiyle ihzâr ettirdiği Nikola v. Yuvan muvâcehesinde târih-i i‘lâmdan bir sene mukaddem Azebler kurbünde vâki‘ Beltaşı fırınından ekmek bey‘ eylediği tablasını gedik olmak üzere mezbûr Nikola zimmî yirmi guruşa bana bey‘ edip meblağ-ı mezbûru mezbûr Nikola zimmîye def‘ ve teslîm ol dahi ber-vech-i muharrer yedimden ahz u kabz eylediğinden sonra zikrolunan tablayı mezbûr Nikola yine yedimden ahz etmekle medfû‘um olan meblağ-ı mezbûr yirmi guruşu mezbûr Nikola’dan taleb ederim deyü ba‘de’d-da‘vâ ve’l-inkâr müdde‘î-i mezbûr Panço zimmî ber-vech-i muharrer müdde‘âsını beyâna kādir olmayıp mezbûr Nikola zimmî bi’t-taleb tahlîf olunmağla mûcebiyle müdde‘î-i mesfûr Panço zimmî bilâ-beyyine bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 10 Rebî‘ülevvel sene 1163