Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 467 Hüküm no: 624 Orijinal metin no: [80b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Âmine bt. Mustafa’nın Ayşe bt. Ebubekir’den aldığı borca karşılık rehin bıraktığı evini borcunu ödeyerek rehniyetten kurtarması için yapılan tenbih Ma‘rûz Sahib-i arzuhâl Süleyman’ın akrabâsından olup zâtı Mehmed Ağa b. Hacı Mustafa ve Süleyman b. Osman ta‘rîfleriyle mu‘arrefe olan Âişe bt. Ebûbekir nâm hatun meclis-i şer‘de yine zâtı mu‘arrefân-ı mezbûrân ta‘rîfleriyle mu‘arrefe olan Şerife Âmine bt. Mustafa nâm hatun muvâcehesinde bin yüz altmış bir senesi Cumâdelûlâsı selhinde mezbûre Şerife Âmine Hatun’a malımdan yüz yetmiş guruş edâ ve teslîm ol dahi yedimden ba‘de’l-ahz ve’l-kabz ve’l-istihlâk mezbûre Şerife Âmine Hatun Devoğlu mahallesinde vâki‘ ma‘lûmü’l-hudûd bir bâb mülk menzilini meblağ-ı mezbûr mukābelesinde ber-mantûk-ı hüccet bi-tarîkı’l-istiğlâl bana bey‘ ve teslîm etmişidi lâkin bey‘-ı mezkûr hakīkatde rehin ve meblağ-ı mezkûr mezbûre Şerife Âmine zimmetinde deyni olmağla hâlâ meblağ-ı mezbûr yüz yetmiş guruşu mezbûre Şerife Âmine Hatun’dan taleb ederim deyü ba‘de’d-da‘vâ ve’s-suâl mezbûre Şerife Âmine Hatun cevâbında fi’l-hakīka meblağ-ı mezbûr yüz yetmiş guruşu müdde‘iye-i mezbûre Âişe yedinden ahz ve menzil-i mezkûr mukābelesinde bi-tarîkı’l-istiğlâl bey‘ eylediğini ikrâr ve i‘tirâf etmeğin mûcebiyle meblağ-ı mezbûr yüz yetmiş guruşu müdde‘iye-i mezbûre Âişe Hatun’a edâ ve teslîm ile fekk-i rehn etmeğe mezbûre Şerife Âmine Hatun’a tenbîh olunduğu Mahkeme-i Bâb’da tescîl ve huzûr-ı âlîlerine i‘lâm olundu bâkī fermân men-lehu’l-emrindir. Fî 13 min-Rebî‘ülevvel sene 1163