Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 468 Hüküm no: 625 Orijinal metin no: [80b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rençber Mehmed b. Ahmed’in kendisini yaralayan Ahmed b. Hüseyin’e açtığı davada sulh olup zimmet ibrası yaptığı Ma‘rûz Rençber tâifesinden Mehmed b. Ahmed nâm kimesne Bâb Mahkemesi’nde Kapıkethudâsı İsmail Beşe kulları mübâşeretiyle meclis-i şer‘-i envere ihzâr ettirdiği Ahmed b. Hüseyin nâm kimesne muvâcehesinde târih-i i‘lâmdan dört gün mukaddem mezbûr Ahmed Bahçekapısı hâricinde Sirkeci İskelesi başında bıçak ile sağ budumun taşrasından bi-gayr-ı hakkın amden beni darb ve cerh etmekle cerh-i mezkûrun mûceb-i şer‘îsini mezbûr Ahmed’den taleb ederim deyü tesâddî eylediğim cerh da‘vâsından bâ-vesâtet-i muslihîn mezbûr Ahmed ile sekiz guruş bedel-i makbûza sulh olup cerh-i mezkûra ve mâ-yuhdesü-minhe müte‘allika âmme-i da‘vâdan mezbûr Ahmed’in zimmetini ibrâ ve ıskāt eyledim deyü olan ikrârını mezbûr Ahmed dahi tasdîk eylediği huzûr-ı âlîlerine i‘lâm olundu. Fî 14 Ra sene 1163