Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 468 Hüküm no: 626 Orijinal metin no: [80b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esirci Abdullah Beşe b. Hüseyin’in Gürcü asıllı cariyesi Hanife’yi kaçırdığı iddiasıyla Ahmed b. Mustafa’ya açtığı davayı ispat edemediği Ma‘rûz Esirci tâifesinden sahib-i arzuhâl Abdullah Beşe b. Hüseyin nâm kimesne meclis-i şer‘-i hatîrde derûn-ı arzuhâlde mezkûrü’l-ism manav küfecilerinden Ahmed b. Mustafa nâm kimesne muvâcehesinde târih-i i‘lâmdan otuz beş gün mukaddem mezbûr Ahmed Peykhâne kurbünde Akarçeşme nâm mahâlde vâki‘ menzilimden üç yüz guruş kıymetli orta boylu kara kaşlı kara gözlü Gürciyyetü’l-asl Hanife nâm câriye-i memlûkemi idlâl ve iğfâl birle apardıp ihtifâ etmekle mevcûde ise câriyem mevsûfe-i mezbûre Hanife’yi müstehleke ise ba‘de’s-sübût kıymet-i mezkûresini mezbûr Ahmed’den taleb ederim deyü ba‘de’d-da‘vâ ve’l-istintâ[k] ve’l-inkâr müdde‘î-i merkūm Abdullah Beşe ber-vech-i muharrer müdde‘âsını bir vechile beyâna kādir olmayıp tahlîfe dahi tâlib olmamağın mûcebiyle müdde‘î-i merkūm Abdullah Beşe câriye-i mevsûfe-i mezbûre mutâlebesiyle bilâ-beyyine-i âdile mezbûr Ahmed’e bî-vech mu‘ârazadan men‘ olunduğu Mahkeme-i Bâb’dan mübâşirleri Kapıkethudâsı Mehmed Beşe kullarıyla huzûr-ı âlîlerine i‘lâm olundu. Fî 14 Ra sene 1163