Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 469 Hüküm no: 628 Orijinal metin no: [81a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keresteci Kiryako v. İstori’ye kereste bedelinden borcu olan Fatma bt. Abdullah’a borcunu ödemesine yapılan tenbih Ma‘rûz Keresteci tâifesinden arzuhâl eden Kiryako v. İstori nâm zimmî meclis-i şer‘-i hatîrde derûn-ı arzuhâlde mezkûreti’l-ism olup zâtı ta‘rîf-i şer‘î ile mu‘arrefe olan Fâtıma bt. Abdullah nâm hatun muvâcehesinde târih-i i‘lâmdan bir sene mukaddem mezbûre Fâtıma Hatun’a Suznân? kurbünde binâ eylediği menzili için tarafından zevc-i sâbıkı işbu hazır bi’l-meclis Süleyman Çavuş vekâletiyle ma‘lûmü’l-ecnâs altmış guruş kıymetli kereste verip kıymet-i mezkûresinden mezbûre Fâtıma Hatun yedinden on bir guruşunu ahz u kabz eyleyip kırk dokuz guruş hakkım zimmetinde kalmağla meblağ-ı bâkī-i merkūm kırk dokuz guruşu mezbûre Fâtıma Hatun’dan taleb ederim deyü ba‘de’d-da‘vâ ve’l-istintâk mezbûre Fâtıma Hatun cevâbında fi’l-hakīka keresteci müdde‘î-i mesfûr Kiryako zimmîden târih-i mezkûrda zevc-i sâbıkı Süleyman Çavuş vekâletiyle ma‘lûmü’l-ecnâs altmış guruş kıymetli kereste iştirâ ve menzilini ta‘mîr edip ol vechile zimmetinde müdde‘î-i mesfûra kereste kıymeti altmış guruşdan bâkī kırk dokuz guruş deyni olduğunu ikrâr ve i‘tirâf edip lâkin vekîl-i mezbûr ile edâ eyledim deyü ba‘de’d-def‘ ve’l-inkâr mezbûre Fâtıma Hatun def‘-i mezkûrunu beyâna kādire olmayıp tâlibe-i tahlîf dahi olmamağla alâ-mûceb-i i‘tirâfihâ meblağ-ı bâkī-i merkūm kırk dokuz guruşu müdde‘î-i mesfûra edâya mezbûre Fâtıma Hatun’a tenbîh olunduğu Mahkeme-i Bâb’dan huzûr-ı âlîlerine i‘lâm olundu. Fî 16 Rebî‘ülevvel sene 1163