Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 470 Hüküm no: 629 Orijinal metin no: [81a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Zâim Ali’nin, büyük oğlu Mustafa kendilerine intikal eden zeametteki hakkını kardeşi Mehmed Emin’in hile ile üzerine geçirdiği iddiasının mahkemece tescil edildiği Ma‘rûz Reisülküttâb sa‘âdetlü efendi dâ‘îlerinin işbu i‘lâmları derûnunda mezkûr ze‘âmetin mutasarrıfı müteveffâ Ali’nin büyük oğlu sahib-i arzuhâl Mustafa babam merkūm fevt oldukda küçük karındaşım Mehmed Emin rufekāsı ittifâkıyla gıyâbımda peydâ eylediği bir âdemi sâbıkā İstanbul kādısı sa‘âdetlü fazîletlü İsmail Âsım Efendi hazretlerinin Bâb nâibi Mustafa Efendi huzûrunda götürüp ol dahi karındaşı olmak üzere babam merkūmun ze‘âmetinden nısf hissemi karındaşım mezbûr Mehmed Emin’e hüsn-i rızâm ile kasr-ı yed eyledim deyü ikrâr ve takrîri i‘lâm olunup lâkin karındaşı olmak üzere götürdüğü âdem ecnebi bir kimesne olmağla husûs-ı merkūmdan benim kat‘a ilim ve haberim yokdur deyü arzuhâli derûnunda eylediği takrîri fi’l-hakīka vâkı‘a mutâbık olup merkūm Mehmed Emin’in karındaşı olmak üzere nâib-i mûmâ-ileyhin huzûruna götürdüğü âdem karındaşı merkūm Mustafa olmayıp âhar kimesne olduğunu yine nâib-i mûmâ-ileyh Mustafa Efendi ile mahkeme-i mezbûre küttâbından Bostanzâde Ahmed Efendi ve Mukayyid Mustafa Efendi ve Muhzırlar kethudâsı Mehmed Ağa ve muhzırlarından Salih Çelebi ve el-Hâc Mustafa ve es-Seyyid Ali ve Urfalı es-Seyyid Mustafa ve es-Seyyid Osman ve Ali nâm kimesneler haber verdikleri sâdır olan fermân-ı âlîlerine imtisâlen huzûr-ı âlîlerine i‘lâm olundu emr hazret-i men-lehu’l-emrindir. Fî 16 Rebî‘ülevvel sene 1163