Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 471 Hüküm no: 631 Orijinal metin no: [81b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yemişçi Mehmed Beşe ile komşuları Hacı Mehmed ve hanımı Fâtıma Hatun’la olan duvar anlaşmazlıklarının sulh yoluyla sonuçlandırıldığı Ma‘rûz Sâdır olan fermân-ı âlîlerine imtisâle kıbel-i şer‘-i enverden irsâl olunan Kâtib Mehmed Efendi dâ‘îleri hâssa mi‘mârlarından Yusuf Halîfe ve es-Seyyid Mehmed Halîfe ile mahmiye-i İstanbul’da Süleymâniye kurbünde Sarı Bâyezid mahallesinde vâki‘ ashâb-ı hayrâtdan asrında rûznâmçe başhalîfesi olan Ali Efendi Vakfı’ndan sahib-i arzuhâl Yemişçi Mehmed Beşe’nin tasarrufunda olan muhterik menzil arsasının üzerine varıp mahzar-ı Müslimînde akd eylediği meclis-i şer‘de yine vakf-ı mezbûrdan ber-vech-i iştirâk mutasarrıflar olan câr-ı mülâsıkı el-Hâc Mehmed ve zevcesi Fâtıma Hatun muvâcehelerinde vakf-ı mezkûr mütevellîsi müderrisîn-i kirâmdan Mahmud Efendi hazır olduğu hâlde mezbûr Yemişçi Mehmed Beşe işbu mu‘âyene olunan muhterik taş duvarı târih-i i‘lâmdan on sene mukaddem ben malım ile binâ edip menzili mülhakātından iken mezbûr el-Hâc Mehmed ve zevcesi mezbûre Fâtıma Hatun bî-vech müdâhale ederler deyü ba‘de’d-da‘vâ ve’l-münâza‘a bâ-vesâtet-i muslihîn mi‘mârân-ı mezbûrân duvar-ı mezkûru muvâcehelerinde mesâha ettiklerinde tûlen on iki zirâ‘ olduğu zâhir ve müte‘ayyin oldukdan sonra sokak yüzündeki kürsî taşı nihâyetine varınca duvar-ı mezkûrun arzından altı parmak mikdârına mezbûr Yemişçi Mehmed mutasarrıf ve mâ‘adâ iç tarafına mezbûr el-Hâc Mehmed ile zevcesi mezbûre Fâtıma mutasarrıf olup ber-vech-i meşrûh üzerine binâlarını vaz‘ etmek üzere sulh eylediklerinde herbiri sulh-ı mezkûru kabûl edip bu vechile kat‘-ı nizâ‘ eylediklerini mezbûr kâtib dâ‘îleri mahâllinde ba‘de’t-tahrîr ma‘an ba‘s olunan Çukadâr İsmail ve Muhzır Hüseyin ile meclis-i şer‘a gelip alâ-vukū‘ihî inhâ ve takrîr eylediği huzûr-ı âlîlerine i‘lâm olundu el-emrü li-men-lehu’l-emr. Fî 16 Rebî‘ülevvel sene 1163