Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 472 Hüküm no: 632 Orijinal metin no: [81b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacce Şerife Fâtıma bt. Abdülhalim ile Şerife Asiye bt. Molla Mehmed’in Konya’da ortak oldukları evlerinin yıkılmasına sebep olduğu iddiasıyla Müderris Numan Efendi b. Hasan Efendi’ye açtıkları zarar davasında haksız bulunup davalarının reddedildiği Bâ-mühr-i hazret-i efendi ve işâret-i aliyye ile olmuşdur Ma‘rûz Sahibetân-ı arzuhâl Hâcce Şerife Fâtıma bt. Abdülhalim ve Şerife Asiye bt. Molla Mehmed nâm hatunlar zâtları ba‘de’t-ta‘rîfi’ş-şer‘î meclis-i şer‘de müderrisîn-i kirâmdan Nu‘man Efendi b. Hasan Efendi ile terâfu‘larında biz vilâyet-i Anadolu’da medîne-i Konya’da Türbe mahallesi sâkinelerinden olup bundan esbak mahalle-i mezkûrede vâki‘ ale’l-iştirâk yedimizde mülkümüz olan menzilimizi ta‘mîr ve üzerine fevkānî ihdâs eylediğim mecmû‘u iki bin yedi yüz guruş kıymetli mülk ebniyemizi kat‘a kimesneye zarar-ı şer‘îsi yoğiken işbu mûmâ-ileyh Nu‘man Efendi medîne-i mezbûrede nâibü’ş-şer‘ iken ahâlî-i mahalleden bazı kimesnelerin hilâf-ı inhâsıyla mugāyir-i şer‘ ta‘ammüd ve cevr edip menzil-i mezkûru hedm ettirdip ve esnâ-i hedmde menzil-i mezkûrda mevcûd mecmû‘u on bin guruşluk eşyâmı dahi ahâlî-i medîne-i mezkûre nehb ü gāret etmeleriyle menzil-i mezkûrun ve eşyâ-i mezkûrenin kıymetleri olan cem‘an on iki bin yedi yüz guruşu mûmâ-ileyh Nu‘man Efendi’den taleb ederim deyü eylediği da‘vâsında takrîrleri üzere eşyâ kıymeti talebi meşrû‘ olmayıp ve menzil hedmi da‘vâlarında dahi mûmâ-ileyh Nu‘man Efendi ta‘ammüd ve cevrini mu‘terif olmayıp mezbûretân-ı mûmâ-ileyhin ta‘ammüd ve cevr eylediğini ikrâr etmişidi deyü ikāmet-i beyyine murâd etseler kavillerine şer‘an iltifât olunmamağla mezbûretân Hâcce Şerife Fâtıma ve Şerife Asiye mûmâ-ileyh Nu‘man Efendi’ye bî-vech mu‘ârazadan men‘ olundukları huzûr-ı âlîlerine i‘lâm olundu. Fî 13 Rebî‘ülevvel sene 1163