Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 472 Hüküm no: 633 Orijinal metin no: [81b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Ağa b. Ebubekir’in Hüseyin Efendi b. Salih’e olan borcunu ödemesi Bâ-mühr-i hazret-i efendi Ma‘rûz Bâ‘is-i i‘lâm Hüseyin Efendi b. Salih nâm kimesne meclis-i şer‘-i hatîre ihzâr eylediği Osman Ağa b. Ebûbekir nâm kimesne ile terâfu‘larında işbu yedimde olan mümzâ ve mahtûm bir kıt‘a deyn temessüğü mantûkunca mezbûr Osman Ağa zimmetinde cihet-i karzdan yüz kırk dokuz guruş hakkım olup hatta mezbûr Osman Ağa meblağ-ı mezbûr cihet-i merkūmeden bana zimmetinde deyni olduğunu ikrâr dahi etmekle meblağ-ı mezbûr yüz kırk dokuz guruşu mezbûr Osman Ağa’dan taleb ederim deyü da‘vâ ettikde mezbûr Osman Ağa cevâbında <> meblağ-ı mezbûr yüz kırk dokuz guruş cihet-i karzdan müdde‘î-i merkūm Hüseyin Efendi’ye zimmetinde deyni olmak üzere ikrâr edip yedine temessük-i mezkûrunu verdiğini ikrâr lâkin kâziben ikrâr etmişidim deyü def‘ edicek merkūm Hüseyin Efendi husûs-ı mezkûrda yemînle tasdîk olunur ümenâdan olmağla müdde‘î-i merkūm Hüseyin Efendi’ye mezbûr Osman Ağa ikrârında kâzib olmadığına bi’t-taleb vech-i şer‘î üzere yemîn verilip mûcebiyle meblağ-ı mezbûr yüz kırk dokuz guruşun edâsıyla mezbûr Osman Ağa ilzâm olunduğu huzûr-ı âlîlerine i‘lâm olundu. Fî 20 Rebî‘ülevvel sene 1163