Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 473 Hüküm no: 634 Orijinal metin no: [81b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fırıncı Hasan Çelebi b. Ali’nin, ekmek bedelinden tablakâr Hasan Beşe b. Mehmed’de olan alacağının ödenmesine yapılan tenbih Bâ-mühr-i hazret-i efendi Ma‘rûz İstanbul’da Karaman-ı Kebîr’de vâki‘ habbâz fırının ustası Hasan Çelebi b. Ali dîvân-ı âlîlerinde ma‘kūd meclis-i şer‘de fırın-ı mezkûrun sâbıkā tablakârı Hasan Beşe b. Mehmed ile terâfu‘larında işbu mezbûr fırın-ı mezkûrda tabh eylediğim malım olan nân-ı azîzden ma‘lûmü’l-mikdâr nân-ı azîzi ibâdullâha füruht ve tablakârlıkdan fâriğ oldukda târih-i i‘lâm senesi Muharremi’l-harâm’ının beşinci günü fırın-ı mezkûr odasında mezbûr ile hesâbımızı gördüğümüzde zimmetinde üç yüz elli bir buçuk guruş füruht eylediği nân-ı azîz semeninden zuhûr edip hatta meblağ-ı mezkûr [82a] üç yüz elli bir buçuk guruş vech-i muharrer üzere zimmetinde hakkım olduğunu ikrâr-ı kat‘î ile ikrâr ve i‘tirâf ve işhâd etmekle hâlâ meblağ-ı mezkûru taleb ederim deyü ba‘de’d-da‘vâ ve’s-suâl ve’l-inkâr müdde‘î-i merkūm Hasan Çelebi müdde‘âsını lede’t-tezkiye adâletleri zâhir olan İbrahim b. el-Hâc Yunus ve diğer İbrahim Çelebi b. Halil şehâdetleriyle mezbûr Hasan Beşe muvâcehesinde vech-i şer‘î üzere isbât etmeğin mûcebince meblağ-ı mezkûr üç yüz elli bir buçuk guruşu mezbûr Hasan Çelebi’ye tamamen edâ ve teslîme merkūm Hasan Beşe’ye tenbîh-i şer‘î olunduğu huzûr-ı âlîlerine i‘lâm olundu. Fî 20 Rebî‘ülevvel sene 1163