Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 474 Hüküm no: 635 Orijinal metin no: [82a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nesim v. Yako ile ortağı Bahor v. Mosi’nin Darbhâne hademesinden Avanis v. Haçador’a olan birikmiş taksit bedelleri ile borçlarını ödemelerine yapılan tenbih Ma‘rûz Darbhâne-i âmire hademesinden Boynueğrioğlu demekle ma‘rûf Avanis v. Haçador v. Avanis nâm zimmî tarafından husûs-ı âti’z-zikri taleb ve da‘vâya vekâlet iddi‘â eden sahib-i arzuhâl Yako v. Mordehay nâm Yahûdî meclis-i şer‘-i enverde Yahûdî tâifesinden arzuhâlde mezkûrü’l-ism olup Halil Çavuş kulları mübâşeretiyle ihzâr ettirdiği Nesim v. Yako ve şerîki Bahor v. Mosi nâm Yahûdiler muvâcehelerinde müvekkilim mersûm Avanis zimmînin mesfûrân Nesin ve Bahor Yahûdiler zimmetlerinde yedimde olan dest-i hat ta‘bîr olunur Yahûd temessüğü mantûkunca mukaddemâ iştirâken malından ve yedinden iştirâ ve kabz ve âhara bey‘le istihlâk eyledikleri vezn ve mikdârı beynlerinde ma‘lûm külçe sîm bahâsından iki bin beş yüz kırk guruş hakkı olmağla meblağ-ı mezkûru beher şehr kendiye ikişer yüz elli dörder guruş verip on ayda tamamen vermek üzere mesfûrânı tecîl ve taksît etmişidi lâkin târih-i i‘lâma gelince beş buçuk ay mürûr edip bir akçe ve bir habbe vermemeleriyle zimmetlerinde meblağ-ı mukāssat-ı mezkûrdan müctemi‘ olan bin üç yüz doksan yedi guruş ile yine mersûmdan iştirâken iştirâ ve kabz ve bey‘le istihlâk eyledikleri vezn ve mikdârı beynlerinde ma‘lûm âyetli kebîr altınlar semeninden dört yüz guruş ki min-haysü’l-mecmû‘ bin yedi yüz doksan yedi guruşu mesfûrân Nesim ve Bahor Yahûdilerden taleb ve da‘vâya tarafından beni tevkîl etmekle ben dahi meblağ-ı merkūm bin yedi yüz doksan yedi guruşu mesfûrân Nesim ve Bahor Yahûdilerden bi’l-vekâle hâlâ taleb ederim deyü ba‘de’d-da‘vâ ve’l-istintâk mesfûrân Nesin ve Bahor Yahûdiler cevâblarında fi’l-hakīka merkūm Yako Yahûdî’nin takrîr-i müdde‘âsı üzere müvekkil-i mersûm Avanis zimmîye zimmetlerinde vezn ve mikdârı beynlerinde ma‘lûm külçe sîm semeninden iki bin beş yüz kırk guruş mukāssaten ve yine vezn ve adedi beynlerinde ma‘lûm âyetli kebîr altınlar semeninden dört yüz guruş ki min-haysü’l-mecmû‘ iki bin dokuz yüz kırk guruş müvekkil-i mersûm Avanis zimmîye deynleri olduğunu ve beş buçuk ayda meblağ-ı mukāssat-ı mezkûrdan bir akçe ve bir habbe vermeyip bin üç yüz doksan yedi guruş müctemi‘ olduğunu ve merkūm Yako Yahûdî’nin dahi ber-vech-i meşrûh vekîl olduğunu herbiri ikrâr ve i‘tirâf etmeğin alâ-mûceb-i i‘tirâfihimâ meblağ-ı mukāssatdan müctemi‘ bin üç yüz doksan yedi guruş ile mârrü’z-zikr altınlar semeninden dört yüz guruş ki min-haysü’l-mecmû‘ bin yedi yüz doksan yedi guruşu müvekkil-i mersûm Avanis zimmîye hâlâ edâya ve mâ‘adâ bin yüz kırk üç guruşu dahi ber-vech-i taksît-i mezkûr beher şehr ikişer yüz elli dörder guruşu yine müvekkil-i mersûm Avanis zimmîye verip târih-i i‘lâmdan dört buçuk ay tamamına değin mukāssaten edâya mesfûrân Nesim ve Bahor Yahûdilere tenbîh olunduğu Mahkeme-i Bâb’dan mübâşir-i merkūm ile huzûr-ı âlîlerine i‘lâm olundu bâkī emr ü fermân hazret-i veliyyü’l-emrindir. Fî 19 Rebî‘ülevvel sene 1163