Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 475 Hüküm no: 636 Orijinal metin no: [82a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Hüseyin’in boşadığı hanımı Şerife Ayşe’nin mehir bedelini velisi olan annesi Emine bt. Abdullah’a ödemesi için yapılan tenbih Ma‘rûz Mahmiye-i İstanbul’da Karagümrük kurbünde Ali Paşa-yı Atîk mahallesinde sâkine ve zâtı ta‘rîf-i şer‘î ile mu‘arrefe olan Emine bt. Abdullah nâm hatun Bâb Mahkemesi’nde sâbıkā dâmadı olup Mumcu İsmail Beşe mübâşeretiyle meclis-i şer‘a ihzâr ettirdiği Ahmed b. el-Hâc Hüseyin nâm kimesne mahzarında mezbûr Ahmed’e sadriye kızım işbu hâzıratü bi’l-meclis Şerife Âişe nâm sagīreyi yirmi guruş mehir tesmiyesiyle mukaddemâ ben bi’l-velâye akd ve tezvîc eyleyip mezbûre Şerife Âişe’ye dâhil oldukdan sonra mezbûr Ahmed târih-i i‘lâmdan iki ay mukaddem zevcesi mezbûre Şerife Âişe’yi Sultan Ahmed Han Câmi‘-i şerîfi kurbünde arasta odalarının birinde benimle ma‘an sâkin olup benimle nizâ‘ ederken mahzar-ı şühûdda bâyinen tatlîk etmekle zimmetinde mütekarrer yirmi guruş mehrini bi’l-velâye mezbûr Ahmed’den taleb ederim deyü ba‘de’d-da‘vâ ve’l-istintâk mezbûr Ahmed cevâbında müdde‘iye-i mezbûrenin kızı sagīre-i mezbûre Şerife Âişe yirmi guruş mehir tesmiyesiyle zevce-i menkûhası olduğunu ve duhûlünü ikrâr lâkin târih-i mezkûrda ber-vech-i muharrer tatlîkını inkâr edicek müdde‘iye-i mezbûre Emine ber-vech-i meşrûh müdde‘âsını lede’t-tezkiye adâletleri zâhir olan Mehmed b. Mustafa ve Yahya b. Hasan nâm kimesneler şehâdetleriyle mezbûr Ahmed muvâcehesinde vech-i şer‘î üzere isbât etmeğin mûcebiyle mehr-i mezkûr yirmi guruşu müdde‘iye-i mezbûre Emine Hatun’a edâya mezbûr Ahmed’e tenbîh olunduğu huzûr-ı âlîlerine i‘lâm olundu. Fî 21 Rebî‘ülevvel sene 1163