Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 475 Hüküm no: 637 Orijinal metin no: [82b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Efendi, Mehmed Ağa, Anton ve Yorgi’nin, Terzi Dimitraki ve ortağı Kostandi’deki alacaklarını taksitler halinde tahsil etmek üzere anlaştıkları Ma‘rûz Mahrûse-i Galata’da Kemeraltı nâm mahâlde Bereketzâde mahallesi mütemekkinlerinden ve terzi tâifesinden olup derûn-ı arzuhâlde isimleri mastûr Dimitraki v. Yorgi ve mahrûse-i merkūmeye tâbi‘ Yeniköy karyesinde Panaya mahallesi mütemekkinlerinden şerîki Kostandi v. Panayot nâm zimmîler meclis-i şer‘-i enverde dâyinlerinden sahib-i arzuhâl Süleyman Efendi b. Mehmed ve Mehmed Ağa b. Ali ile Anton v. İspandol ve Yorgi v. Apandol nâm zimmîler muvâcehelerinde mesfûrân Dimitraki ve Kostandi nâm zimmîler mezbûr Süleyman Efendi’ye beynlerinde ma‘lûm eşyâ semeninden dokuz yüz elli guruş ve merkūm Mehmed Ağa’ya cihet-i deyn-i şer‘îden iki yüz kırk guruş ve mersûm Yorgi zimmîye beynlerinde ma‘lûm eşyâ semeninden ve cihet-i deyn-i şer‘îden dört yüz yetmiş yedi guruş ve mesfûr Anton zimmîye cihet-i deyn-i şer‘îden üç yüz on beş guruş ki min-haysü’l-mecmû‘ iki bin seksen iki guruş zimmetlerinde edâsı lâzım mezkûrûna deynleri olduğunu herbiri ikrâr ve i‘tirâf eylediklerinden sonra mesfûrân Dimitraki ve Kostandi zimmîler deynleri olan meblağ-ı mecmû‘-ı mezkûru hâlen ve def‘aten edâya iktidârları olmayıp tecîl ve taksîte tâlib olduklarında dâyinleri merkūmûn Süleyman Efendi ve Mehmed Ağa ve Yorgi ve Kostandi’den herbiri dahi her otuz günde kendilerine guruş başına birer akçe verip târih-i i‘lâmdan yüz yirmi ay tamamına değin deyn-i meblağ-ı mecmû‘-ı merkūmu tamamen edâ etmek üzere medyûn-ı mesfûrânı tecîl ve taksît eylediklerinde onlar dahi ba‘de’l-kabûl deynleri olan meblağ-ı mecmû‘-ı mezkûr iki bin seksen iki guruşu ber-vech-i taksît-i mezkûr müddet-i madrûbe tamamınadek mukāssaten edâya ta‘ahhüd ve iltizâm eyleyip bu vechile kat‘-ı nizâ‘ eyledikleri Mahkeme-i Bâb’dan huzûr-ı âlîlerine i‘lâm olundu. Fî 21 Rebî‘ülevvel sene 1163