Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 476 Hüküm no: 638 Orijinal metin no: [82b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çukacı Nikola v. Yani’ye olan borcundan dolayı hapsedilen Hacı Süleyman b. Abdullah’ın borcunu taksitler halinde ödemeye taahhüt etmesiyle Nikola ile anlaştıkları Ma‘rûz Bâ-i‘lâm-ı şer‘î çuka bahâsından yüz on guruş deyni için yirmi üç gün sicn-i sultânîde mahbûs olan sahib-i arzuhâl el-Hâc Süleyman b. Abdullah meclis-i şer‘-i enverde dâyini Çukacı Nikola v. Yani nâm zimmî muvâcehesinde mezbûr el-Hâc Süleyman deyn-i meblağ-ı mezbûr yüz on guruşu hâlen ve def‘aten edâya iktidârı olmayıp tecîl ve taksîte tâlib oldukda dâyin-i mesfûr Nikola dahi beher otuz günde kendiye beşer guruş verip târih-i i‘lâmdan yirmi iki ay tamamına değin meblağ-ı mezbûr yüz on guruşu tamamen edâ etmek üzere mezbûr el-Hâc Süleyman’ı tecîl ve taksît eyledikde ol dahi ba‘de’l-kabûl ber-vech-i taksît-i mezkûr meblağ-ı mezbûr yüz on guruşu müddet-i madrûbe tamamına dek edâya ta‘ahhüd ve iltizâm eyleyüp bu vechile kat‘-ı nizâ‘ eyledikleri Mahkeme-i Bâb’dan huzûr-ı âlîlerine i‘lâm olundu. Fî 23 Rebî‘ülevvel sene 1163