Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 82 Hüküm no: 51 Orijinal metin no: [13a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Amasya’nın Havza kazası Tigay köyündeki Beymelek Hatun Vakfı’nın tevliyetine ait nısf hissenin Seyyid Lütfullah’a tevcihi Sâdır olan fermân-ı âlîlerine imtisâlen Amasya Kādısı es-Seyyid Mustafa Tevfik Efendi dâ‘îlerinin işbu arzı ve Trabzon ve A[ma]sya mülhakātı olan eyâlât ve elviye mutasarrıfı düstûr-ı salâbet-mevfûr sa‘âdetlü atûfetlü Osman Paşa hazretlerinin merbût olan inhâları ve derkenârlar mütâla‘a olundukda Amasya sancağında Havza kazâsına tâbi‘ Tigay karyesinde vâki‘ Beymelek Hatun Vakfı’nın vazîfe-i mu‘ayyene ile tevliyeti batn-ı evvelde olan ekber ve e[r]şed evlâd-ı vâkıfa meşrûta olmak üzere te‘âmül-i kadîm cârî olarak tevliyet-i mezkûreye ber-vech-i meşrûta mutasarrıfa olup batn-ı evvelde olduğu tevâtüren sâbit ve zâhir olan Şerife Ümmü Gülsüm bt. es-Seyyid Feyzullah bundan akdem fevt oldukda evlâd-ı vâkıfdan es-Seyyid Lütfullah ile müteveffât-ı mezbûrenin sadriye kızı Âişe Hatun batn-ı evvelde ekber ve erşed ve derecede birbirlerine müsâvî iken mezbûre Âişe Hatun bundan akdemce mezbûr es-Seyyid Lütfullah’ı ketb ve ihfâ ile tevliyet-i mezkûreyi bâ-arzuhâl müstakilleten kendi üzerine tevcîh ve berat etmiş ise de husûs-ı mezkûrda te‘âmül-i kadîm vech-i muharrer üzere olup mezbûre Âişe ile merkūm es-Seyyid Lütfullah batn-ı evvelde ekber ve erşed ve derecede birbirlerine müsâvî oldukları medîne-i mezbûrede hâlâ me’zûn bi’l-iftâ Bakizâde es-Seyyid Mehmed Efendi ve müfti-i sâbık Ahmed Necib Efendi ve müfti-i esbak el-Hâc Mehmed Efendi ve müfti-i esbak Ebûbekir Efendi ve kāimmakām-ı nakībü’l-eşrâf es-Seyyid el-Hâc Ali Bey ve a‘yân-ı belde Osman Bey ve vücûh-ı ahâlîden el-Hâc İbrahim Bey ve el-Hâc Ömer Bey ve Gençzâde Mustafa Ağa ve Muhyiddin Ağa ve Türidizâde el-Hâc Hasan Ağa ve sâir cemm-i gafîr kimesneler ihbârlarıyla zâhir ve mütehakkık olduğundan bahisle tevliyet-i mezkûrenin nısfı şart-ı vâkıf ve te‘âmül-i kadîm üzere mezbûre Şerife Âişe’nin ref‘inden ve müteveffiye-i mezbûre mahlûlünden merkūm es-Seyyid Lütfullah’a tevcîh olunmasını kādı-yı mûmâ-ileyh arz ve vezîr-i müşârün-ileyh hazretleri inhâ ederler vâkı‘a tevliyet-i mezkûre vâkıfe-i mûmâ-ileyhânın evlâd-ı evlâdının zükûr [ve] inâsına meşrûta olduğu vakfiye-i me’mûlün-bihâsında mastûr [ve] meşrûh olmağla tevliyet-i mezkûre evlâd-ı vâkıfdan batn-ı evvelde olduğu tevâtüren sâbit ve zâhir olan Şerife Ümmü Gülsüm nâm reşîdenin ber-vech-i meşrûta mutasarrıfa iken fevt olmağla mahlûlünden fevti ve kerîmesi olduğu vâki‘ ve nevbet-i tasarruf kendinin ise şartıyla işbu sene-i mübâreke Saferü’nde bâ-arzuhâl mezbûre Şerife Ümmü Gülsüm Hatun’a tevcîh olunup el-yevm üzerinde idiği derkenârdan ve mazmûn-ı arz vâkı‘a mutâbık ve nefsü’l-emre muvâfık idiği medîne-i mezbûre ahâlîsinden bu esnâda Der-aliyye’ye gelen bî-garaz erbâb-ı vukūfdan (...?) ihbârlarıyla mütehakkık ve ayân olmağın bu sûretlere kādı-yı mûmâ-ileyhin arzı ve vâlî-i müşârün-ileyh hazretlerinin inhâsı mûceblerince tevliyet-i mezkûrenin nısfı şart-ı vâkıf ve te‘âmül-i kadîm üzere mezbûre Şerife Âişe’nin ref‘inden ve müteveffiye-i mezbûre mahlûlünden merkūm es-Seyyid Lütfullah’a tevcîh olunmak iktizâ eylediği huzûr. Fî-Şa‘bân sene [12]48