Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 477 Hüküm no: 640 Orijinal metin no: [82b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri v. Yorgi’nin mahzenine girip tütünlerini çalan Hasan b. İbrahim’in hırsızlık konusunda sabıkalı olduğundan cezalandırılması ve bunun gibi durumu şüpheli olanların da haklarından gelinmesi Bâ-mühr-i hazret-i efendi Ma‘rûz İstanbul’da Hasır İskelesi’nde vâki‘ Duhan gümrüğü kurbünde duhan mahzeninde sâkin Dimitri v. Yorgi nâm zimmî meclis-i şer‘de Mumcu Hüseyin Beşe mübâşeretiyle ihzâr ettirdiği Hasan b. İbrahim muvâcehesinde târih-i i‘lâm gecesi beyne’l-ışâeyn mezbûr Hasan zikrolunan mahzenimin kuflünü kırıp derûnundan işbu mu‘âyene olunan üç bohça dul Hanımı bi-gayr-ı hakkın ahz ve firâr eder iken sûk-ı mezkûr bekçilerinden işbu hâzırân bi’l-meclis Eyüb b. İbrahim ve Mehmed b. Mehmed mezbûr Hasan’ı ahz etmeleriyle suâl olunup zikrolunan üç bohça duhanı mezbûr Hasan’dan istirdâd murâd ederim deyü ba‘de’d-da‘vâ ve’s-suâl mezbûr Hasan minvâl-i muharrer üzere olduğunu ikrâr ve i‘tirâf etmeğin mûcebiyle zikrolunan üç bohça duhanı müdde‘î-i mesfûr Dimitri zimmîye teslîme mezbûr Hasan’a ba‘de’t-tenbîh sûk-ı mezkûr ahâlîsinden el-Hâc Mustafa ve Halil Çelebi ve el-Hâc Ömer ve diğer el-Hâc Ömer ve Osman Çelebi ve Mehmed Çelebi ve Süleyman Çelebi ve sâir cerîdede mazbûtü’l-esâmî on beş neferden mütecâviz kimesneler meclis-i şer‘de mezbûr Hasan muvâcehesinde mezbûr Hasan bundan akdem üç def‘a dahi bu makūle emr-i kerîhe tesâddî ve ahz olunmağla bir vechile mütenebbih olmayıp mezbûr Hasan esvâkda ve hânelerde duhan bey‘i bahânesiyle ve sâirleri dahi mechûlü’l-ahvâl kimesneler ile gezip mezbûrûndan bir vechile emniyetimiz olmamağla men‘ olunmaları matlûbumuzdur deyü teşekkî etmeleriyle mezbûr Hasan’ın iktizâ eden tedîbi ve sâir bu misillü mechûlü’l-ahvâl kimesneler duhancılık bahânesiyle esvâk ve hânelerde gezmeleri men‘i re’y-i âsafânelerine ihâle olunduğu huzûr-ı âlîlerine i‘lâm olundu. Fî 26 Rebî‘ülevvel sene 1163