Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 478 Hüküm no: 641 Orijinal metin no: [83a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Duhancı Suhte Hacı Mehmed Subaşı’nın bazı eşyalarının çalınmasıya itham ettiği Dalgıç Mustafa’nın sabıkası olduğu tespit edildiğinden cezalandırılması Ma‘rûz Arzuhâl sahibi Duhânî Suhte el-Hâc Mehmed Subaşı el-Hâc Mehmed Ağa kulları mübâşeretiyle Bâb Mahkemesi’nde meclis-i şer‘a ihzâr ettirdiği Dalgıç Mustafa muvâcehesinde işbu mu‘âyene olunan bir bakır duhan kavanozumu ve bir bakır mangalımı târih-i i‘lâmdan on gün mukaddem İstanbul’da Tahtakale kurbünde vâki‘ dükkânımdan zâyi‘ olmakla hâlâ Galata’da Kalyoncu İbrahim nâm kimesne yedinde bulup suâl eylediğimde işbu Dalgıç Mustafa bana bey‘ için emânet verdi deyü cevâb verip eşyâyı teslîm eyledi mezbûr Dalgıç Mustafa’dan suâl olunsun dedikde gıbbe’l-istintâk mezbûr Dalgıç Mustafa dahi cevâbında mârrü’z-zikr kavanoz ve mangalı Tahtakale’de Uzun Bekçi nâm kimesneden beş guruşa iştirâ edip bey‘ için mezbûr Kalyoncu İbrahim’e vermişidim mezbûrun mülkü olduğu ma‘lûmum değildir dedikde müdde‘î-i mezbûr Suhte el-Hâc Mehmed müdde‘âsını gāib-i mezbûr Kalyoncu İbrahim ile merkūm muvâcehesinde isbâta havâle olundukdan sonra ipçi esnâfından el-Hâc Ali nâm kimesne dahi meclis-i şer‘de mezbûr Dalgıç Mustafa muvâcehesinde târih-i i‘lâmdan dört gece mukaddem beyne’l-ışâeyn mezbûr Dalgıç Mustafa İstanbul’da sicn-i sultânî kurbünde sûkda ipçi dükkânımın kepenkini kırıp derûnuna girip lâkin bir nesnemi ahz etmeksizin duyuldukda asesbaşı tarafından ahz olunmuşdur suâl olunsun dedikde gıbbe’s-suâl mezbûr Dalgıç Mustafa cevâbında vakt-i mezkûrda ben sekrân olup sûk-ı mezkûrda yatmışidim kendimi bilmem deyü dükkân-ı mezkûra girdiğini ba‘de’l-inkâr mezbûr İpçi el-Hâc Ali’nin müdde‘âsı üzere fi’l-hakīka dalgıç arasında ahz eylediklerini asesbaşı bayrakdârı İsmail Beşe b. İsa ve neferâtından Ahmed Beşe b. İbrahim ve Ali Beşe b. Mehmed ve Hasan Beşe b. Hüseyin ve Osman Beşe b. Mehmed nâm kimesneler mezbûr Dalgıç Mustafa muvâcehesinde alâ-tarîkı’ş-şehâde haber vermeleriyle mezbûr Dalgıç Mustafa’nın ta‘zîri emr-i veliyyü’l-emre ihâle olunduğu huzûr-ı âlîlerine i‘lâm olundu. Fî 25 Rebî‘ülevvel sene 1163