Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 479 Hüküm no: 642 Orijinal metin no: [83a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed b. Abdüsselam’a borcu olan Kazancı Kabril v. Burunsuz Simaven’in borcunu ödemesine yapılan tenbih Ma‘rûz Mahrûse-i Galata müzâfâtından kasaba-i Kasımpaşa’da Kamer Hatun mahallesi sükkânından sahib-i arzuhâl es-Seyyid Mehmed b. es-Seyyid Abdüsselam nâm kimesne meclis-i şer‘-i hatîrde derûn-ı arzuhâlde mezkûr Unkapanı hâricinde Kazgancı Kabril v. Burunsuz Simaven nâm zimmî muvâcehesinde işbu yedimde olan deyn temessüğü mantûkunca târih-i i‘lâmdan bir sene mukaddem kasaba-i merkūmede Cum‘apazarı sûku köşesi başında vâki‘ duhancı dükkânımda mesfûr Kabril zimmîye babası mersûm Burunsuz Simaven zimmî kefâletiyle karz-ı şer‘î yetmiş guruş verip hâlâ zimmetinde kalmağla meblağ-ı mezbûr yetmiş guruşu mesfûr Kabril zimmîden taleb ederim deyü ba‘de’d-da‘vâ ve’l-inkâr müdde‘î-i mezbûr ber-vech-i muharrer müdde‘âsını kasaba-i mezbûre ahâlîsinden lede’t-tezkiye adâletleri zâhir olan Kazgancıoğlu Ahmed Beşe b. Mehmed ve İpçi Mehmed Beşe b. el-Hâc Ali nâm kimesneler mesfûr Kabril zimmî muvâcehesinde ber-vech-i şer‘î isbât etmeğin mûcebince meblağ-ı mezbûr yetmiş guruşu müdde‘î-i mezbûr es-Seyyid Mehmed’e edâya mesfûr Kabril zimmîye tenbîh olunduğu Mahkeme-i Bâb’da tescîl ve mübâşirleri Hüseyin Çavuş kulları ile huzûr-ı âlîlerine i‘lâm olundu. Fî 25 min-şehri Rebî‘ülevvel sene 1163