Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 479 Hüküm no: 643 Orijinal metin no: [83a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Agop ve hanımı Gül’ün, daha önce tasarruflarındaki vakıf menzili aldıkları borca karşılık rehin verip daha sonra sattıkları evin tekrar kendilerine bedeliyle iade edilmesi talebiyle açtıkları davada haksız bulundukları Bâ-mühr-i hazret-i efendi Ma‘rûz Sahibûn-ı arzuhâl Agop zimmî ile zevcesi olup zâtı ta‘rîf-i şer‘î ile mu‘arrefe olan Gül Nasrâniye meclis-i şer‘de zikri âtî vakıf menzilin hâlâ mütevellîsi olan İsmail Efendi hazır olduğu hâlde arzuhâlde mezkûr Sakaoğlu demekle ma‘rûf Artin zimmî ile terâfu‘larında mahmiye-i İstanbul’da Kadırga Limanı kurbünde vâki‘ Kâtib Sinan Efendi Mescid-i şerîfi vakfının müstagallâtından olup mahmiye-i mezkûrede Langa kurbünde Kâtib Kasım mahallesinde vâki‘ ma‘lûmü’l-hudûd ve’l-müştemilât vakıf menzile bi’l-icâreteyn ve ber-vech-i iştirâk mutasarrıfân iken târih-i i‘lâmdan yedi sene mukaddem mesfûr Artin’den sekiz yüz guruş istikrâz mukābelesinde menzil-i mezkûru bâ-ma‘rifet-i mütevellî ferâğ bi’l-vefâ ile ferâgat eylediğimizden sonra meblağ-ı mezkûrun dört yüz guruşunu mukaddem Artin’e edâ ve teslîm ve dört yüz guruşu hâlâ zimmetimizde olmağın meblağ-ı bâkī-i mezkûr dört yüz guruşu ahz ve menzil-i mezbûru yine bâ-ma‘rifet-i mütevellî bize ferâgat eyle dediğimizde mümâna‘at eder suâl olunup kasr-ı yedine tenbîh olunmak matlûbumuzdur deyü ba‘de’d-da‘vâ ve’s-suâl mesfûr Artin müdde‘iyân-ı mesfûrânın müdde‘âlarını ber-minvâl-i muharrer ikrâr lâkin târih-i i‘lâmdan yedi ay mukaddem mesfûr Agop ve zevcesi Gül Nasrâniye şuhûd mahzarında menzil-i mahdûd-ı mezkûrun bedel-i misli olan iki bin iki yüz guruş bedel mukābelesinde bana bey‘ ve teslîm ben dahi ber-minvâl-i muharrer kabûl eylediğimden sonra meblağ-ı mezkûrun dört yüz guruşunu deynlerine takās onlar dahi mukāssa ve kabûl ve mâ‘adâ bin sekiz yüz guruşunu mesfûrân Agop ile zevcesi Gül Nasrâniye’ye târih-i mezkûrda def‘ ve teslîm eylediğimde onlar dahi bi-kadri’l-hısas yedimden ahz u kabz eylediklerinden sonra menzil-i mezkûrun ferâğ-ı vefâ da‘vâsından benim zimmetimi ibrâ ve ıskāt eylediler deyü def‘ ve def‘-i mezkûrunu mahalle-i mezkûre sükkânından Aleksan v. Panos ve Melkon v. Manuk ve Asvador v. Kirkor ve Onan v. Sefer nâm dört nefer zimmîler ile isbât etmeğin mesfûrân Agop ve Gül Nasrâniye mesfûr Artin zimmîye bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 24 Rebî‘ülevvel sene 1163