Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 480 Hüküm no: 644 Orijinal metin no: [83b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kemhacı esnafının, hal ve hareketlerinden şikayet edip esnaflıktan çıkarılmasını talep ettikleri Halil b. İbrahim’in bir daha uygunsuz ve nizamsız hareket etmeyeceği sözünü vermesiyle sulh oldukları Ma‘rûz Mahmiye-i İstanbul’da vâki‘ kemhâcı esnâfından ashâb-ı arzuhâl kethudâları el-Hâc Ahmed Ağa ve yiğitbaşıları İsmail Çelebi ve du‘âcıları İbrahim Çelebi ile müsin ve ihtiyârlarından es-Seyyid Hüseyin Çelebi ve es-Seyyid Yusuf Çelebi ve es-Seyyid el-Hâc Mustafa ve Ahmed Çelebi ve Halil Çelebi ve Mehmed Çelebi ve Molla İbrahim ve Abdülgani ve el-Hâc İbrahim ve sâirleri meclis-i şer‘-i hatîrde yine esnâf-ı mezbûreden derûn-ı arzuhâlde mezkûrü’l-ism Sarıkabukoğlu demekle ma‘rûf Halil b. İbrahim nâm kimesne mahzarında mezbûr Halil esnâfımız olup lâkin kendi hâlinde olmadığından mâ‘adâ bed-zebân ve hadîdü’l-lisân olup herbirimize itâle-i lisândan hâlî olmayıp ve kadîmî esnâfımız beyninde verilegelen nizâmımıza mugāyir vaz‘ ve hareket eyleyip kadîmî nizâmımızın ihtilâline bâ‘is ü bâdî olmağın kendiye bi’d-defa‘ât nush u pend eylediğimizde kat‘a ısgā etmeyip mütenebbih olmadığından gayri cümlemizin muvâcehesinde şütûm-ı galîza ile ihtiyârlarımıza şetm ve hetk-i ırz etmekle mezbûr Halil’den bir vechile emniyet ve rahatımız yokdur deyü bi’l-muvâcehe teşekkî ve mezbûr Halil’in san‘at-ı mezkûrdan ihrâcla ta‘zîr olunmasını iltimâs eylediklerinde mezbûr Halil dahi fîmâ-ba‘d kendi hâlinde olup esnâf-ı mezbûrenin umûruna karışmayıp ve hilâf-ı nizâm vaz‘ ve hareket etmeyip ba‘de zaman hilâf-ı nizâm-ı kadîm vaz‘ ve hareketde bulunup itâle-i lisân ile esnâf-ı mezkûreyi ta‘cîz eder ise san‘at-ı mezkûreden ihrâc olunmak üzere müte‘ahhid oldukda merkūmûn dahi râzılar olup bu vechile kat‘-ı nizâ‘ eyledikleri Mahkeme-i Bâb’dan huzûr-ı âlîlerine i‘lâm olundu. Fî 27 Rebî‘ülevvel sene 1163