Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 487 Hüküm no: 652 Orijinal metin no: [85a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Danyel v. Asvador’in, hizmetini gördüğü Samson Yoseb v. Tanaş’da alacak iddiasıyla açtığı davada sulh olup zimmet ibrası yaptığı Ma‘rûz Arzuhâl eden Danyel v. Asvador nâm zimmî meclis-i şer‘-i enverde derûn-ı arzuhâlde mezkûr şerbetçi tâifesinden Samson Yoseb v. Tanaş nâm zimmî muvâcehesinde ben mesfûrun Kumkapı dâhilinde vâki‘ şerbethânesinde hademesinden olup bin yüz elli bir senesi târihinde merkūm Samson Yoseb Tersâne-i âmire’de vâki‘ çekdiri sefînesinden iştirâ eylediği hamrı ben ve refîkım Mihal nâm zimmî merkūmun şerbethânesine götürür iken târih-i mezkûrda kāimmakām olan merhûm Yeğen Mehmed Paşa hazretlerinin tebdîl çukadârları esnâ-i tarîkde bizi ahz ve bâ-fermân-ı âlî Tersâne-i âmire’de küreğe vaz‘ olunmuşidik mesfûr Samson Yosef bana refîkım Mihal’i Tersâne-i âmire’den afv ve ıtlâkına her ne mikdâr akçe harc u sarf edersen sen malından harc u sarf eyle ben malımdan masrûfunu veririm deyü bana emretmekle ben dahi mesfûrun emrine binâen malımdan rücû‘ şartıyla refîkım mersûm Mihal’in ve benim kürekden ıtlâkımız için seksen guruş harc u sarf etmişidim masrûfum olan meblağ-ı mersûm seksen guruşu mesfûrdan bi’l-mürâca‘a taleb ederim deyü tesâddî eylediğim da‘vâ-yı mezkûremden bâ-tavassut-ı muslihîn mesfûr Samson Yoseb ile üç Mısır zencirîsi altın bedel-i makbûza sulh olup mâ‘adâsına ve sâire müte‘allika âmme-i da‘vâdan mesfûr Samson Yosef’in zimmetini ibrâ ve ıskāt eyledim deyü olan ikrârını mesfûr Samson Yoseb dahi tasdîk eyledi Mahkeme-i Bâb’dan huzûr-ı âlîlerine i‘lâm olundu. Fî 5 Rebî‘ülâhir sene 1163