Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 487 Hüküm no: 653 Orijinal metin no: [85a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Abdullah’ın boşandığı karısı Hanife bt. Abdullah’a mehir bedeli ve diğer borçlarını ödemesine yapılan tenbih Ma‘rûz İstanbul’da merhûm Sultan Mehmed Han Câmi‘-i şerîfi kurbünde Mi‘mâr Sinan mahallesi sâkinelerinden olup zâtı mahalle-i mezbûre imâmı Mehmed Efendi b. Abdurrahman ve Abdullah Çelebi b. Mehmed ta‘rîfleriyle mu‘arrefe olan sahibe-i arzuhâl Hanife bt. Abdullah nâm hatun meclis-i şer‘de zevc-i sâbıkı olup derûn-ı arzuhâlde mezkûr Ali b. Abdullah muvâcehesinde mezbûr Ali zevcim olup târih-i i‘lâmdan on beş gün mukaddem beni bâyinen tatlîk etmekle mezbûr Ali’ye zevciyet beynimizde kāime iken ber-mantûk-ı temessük karz-ı medfû‘um olan elli guruşu mezbûr Ali’den ba‘de’d-da‘vâ ve’l-münâza‘a bâ-vesâtet-i muslihîn da‘vâ-yı mezkûremden mezbûr Ali ile otuz guruş üzerine sulh olup meblağ-ı mezbûrun mâ‘adâsı olan yirmi guruşa müte‘allika âmme-i da‘vâdan mezbûr Ali’nin zimmetini ibrâ ve ıskāt etmemle hâlâ bedel-i sulh olan meblağ-ı mezbûr otuz guruşu ve yine mezbûr Ali zimmetinde mahkûmun-bih hakkım olan on bir guruş ile zimmetinde mütekarrer ve ma‘kūdün-aleyh on guruş mehr-i müeccelimi ve nafaka-i iddet ve meûnet-i süknâm için bi’t-terâzî ta‘yîn olunan üç guruş ki min-haysü’l-mecmû‘ elli dört guruşu mezbûr Ali’den taleb ederim deyü ba‘de’d-da‘vâ ve’s-suâl mezbûr Ali cevâbında fi’l-hakīka cihât-ı mezkûreden müdde‘iye-i mezbûre Hanife Hatun’a elli dört guruş deyni olduğunu ikrâr ve i‘tirâf etmeğin mûcebiyle meblağ-ı mezbûr elli dört guruşu müdde‘iye-i mezbûre Hanife Hatun’a edâ ve teslîme mezbûr Ali’ye tenbîh olunduğu Bâb’dan huzûr-ı âlîlerine i‘lâm olundu. Fî 7 Rebî‘ülâhir sene 1163