Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 489 Hüküm no: 656 Orijinal metin no: [85b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zahide bt. Hüseyin’in çocuklarının nafakası, eşyalar ve daha önceki mehir bedellerinden alacağı olduğu kocası Ahmed Ağa b. Hacı Ferhad’da kalan parasını kocasına hîbe edip zimmetin ibra ettiği Ma‘rûz Derûn-ı i‘lâm-ı evvelde mezkûreti’l-ism olup zâtı Hocapaşa kurbünde Kareki mahallesi sükkânından Hasan Ağa b. Abdullah ve Mustafa Ağa b. Ali ve el-Hâc Salih b. Osman nâm kimesneler ta‘rîfleriyle mu‘arrefe olan Zahide bt. Hüseyin nâm hatun bi’t-terâzî Bâb Mahkemesi’nde hâlâ zevci olup i‘lâm-ı sâbıkda mezkûrü’l-ism olan Ahmed Ağa b. el-Hâc Ferhad mahzarında işbu yedimde olan i‘lâm-ı musâlahada tafsîl ve beyân olunduğu üzere mukaddemâ zevcim mezbûr Ahmed Ağa’dan iddi‘â eylediğim dokuz yüz elli guruşluk eşyâ ve diyâr-ı âharda iken dört senede kendim ile sulbî sagīr oğlu Mehmed Sâdık ve sulbiye sagīre kızı Ümmügülsüm’ün nafakalarına emriyle altı yüz yirmi beş guruş masrûfum ve sâbıkā beni tatlîk etmekle zimmetinde kalan yüz guruş mehr-i müeccelim da‘vâsında zevcim mezbûr Ahmed Ağa ile bâ-vesâtet-i muslihîn beş yüz guruş bedel üzerine sulh olup bedel-i sulh-ı mezkûr beş yüz guruşdan mâ‘adâ husûs-ı mezkûrlara ve sâireye müte‘allika âmme-i da‘vâdan zevcim mezbûr Ahmed Ağa’nın zimmetini ibrâ-i âm ile ibrâ ve ıskāt etmişidim hâlâ zevcim mezbûr Ahmed Ağa bedel-i sulh-ı mezkûrdan zimmetinde hakkım olan beş yüz guruşun üç yüz guruşunu bana nakden def‘ ve teslîm ben dahi yedinden ba‘de’l-ahz ve’l-kabz mâ‘adâ iki yüz guruşu zevcim mezbûr Ahmed Ağa’nın hâline merhameten mezbûr Ahmed Ağa’ya hîbe-i sahîha-i şer‘iye ile hîbe eylediğimde ol dahi <> meclis-i hîbede ittihâb ve kabûl eyleyip bedel-i sulh-ı mezkûr beş yüz guruşu zevcim mezbûr Ahmed Ağa’dan bu vechile ahz ve istifâ edip meblağ-ı mezkûrdan zimmetinde bir akçe ve bir habbe alacağım <> kalmamağla zikrolunan bedel-i sulh-ı merkūm beş yüz guruşa müte‘allika âmme-i da‘vâdan zevcim mezbûr Ahmed Ağa’nın zimmetini ibrâ-i âm ile ibrâ ve ıskāt eyledim deyü olan ikrârını zevci mezbûr Ahmed Ağa dahi tasdîk eylediği huzûr-ı âlîlerine i‘lâm olundu. Fî 8 Rebî‘ülâhir sene 1163