Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 490 Hüküm no: 657 Orijinal metin no: [85b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe b. Hüseyin’in Esirci Halil Odabaşı’dan satın aldığı Gürcü asıllı cariye Zeyneb’in frengî hastası olduğundan cariyeyi iade edip sulh yoluyla bedelini tahsil ettiği Ma‘rûz Sahib-i arzuhâl Mehmed Beşe b. Hüseyin meclis-i şer‘de derûn-ı arzuhâlde mezkûrü’l-ism Esirci Halil Odabaşı muvâcehesinde târih-i i‘lâmdan iki buçuk ay mukaddem orta boylu açık kaşlı kara gözlü Gürciyyetü’l-asl Zeyneb nâm bir bikr-i bâliğa câriyeyi cemî‘ uyûbdan sâlime olmak üzere yedi yüz seksen guruş semen-i medfû‘ ve makbûza mezbûr Halil Odabaşı’dan iştirâ etmişidim hâlâ [câ]riye-i mezkûre frengî marazına mübtelâ olmağla mu‘ayyebe olup ve ayb-ı mezkûr inde’t-tüccâr noksan semen îcâb eder uyûbdan olmağla geri red ve semen-i mebî‘-i mezkûru mezbûr Halil Odabaşı’dan taleb ederim deyü tesâddî eylediğim da‘vâmdan bâ-vesâtet-i muslihîn kırk guruş bedel-i makbûza sulh olup câriye-i mezkûreye müte‘allika âmme-i da‘vâdan mezbûr Esirci Halil Odabaşı’nın zimmetini ibrâ ve ıskāt eylediğimde ol dahi bedel-i sulh olmak üzere bana medfû‘u olan meblağ-ı mezkûr kırk guruşa müte‘allika âmme-i da‘vâdan benim zimmetimi ibrâ ve ıskāt eyledi deyü olan ikrârını mezbûr Esirci Halil Odabaşı dahi tasdîk eylediği Bâb’dan huzûr-ı âlîlerine i‘lâm olundu. Fî 8 min-Rebî‘ülâhir sene 1163