Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 490 Hüküm no: 658 Orijinal metin no: [85b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sandalcı, kutnici ve sair kumaş dokuyan esnafın nizama aykırı olarak kumaş dokuyan Hürmüz v. Serkiz’in esnaflıktan ihraç edilmesi talepleri Ma‘rûz İstanbul’da vâki‘ sandalcı ve kutnîci ve sâir akmişe nesc eden hirfetin kethudâları Abdullah Ağa ve yiğitbaşıları es-Seyyid el-Hâc Hicâzî ve ustalardan Mustafa Çelebi ve Mehmed ve es-Seyyid Hüseyin ve el-Hâc Hüseyin ve es-Seyyid Adem ve es-Seyyid Ömer ve el-Hâc Ahmed ve Abdi Çelebi ve Mahmud Beşe ve Abdullah Çelebi ve Mehmed Çelebi ve es-Seyyid Halil ve Mustafa Çelebi ve diğer Mustafa ve zimmî ustalardan Melkon ve Minnet ve Kirkor ve Marat ve Corci ve Aşra? ve Yoseb meclis-i şer‘de Kumkapı hâricinde vâki‘ Eski Damgahâne nâm mahâlde kutnî ve sandal nesc eden Hürmüz v. Serkiz zimmî muvâcehesinde kadîmü’l-eyyâmdan berü nesc eylediğimiz kutnîyi altı bin telden nesc edip noksan ve kālıb işlememek üzere beynimizde kavl ve ittifâk ve ahd ü mîsâk eylediğimiz cihet-i şer‘iye ve mûcebince tuğrâlı emr-i âlî ısdâr edip vech-i meşrûh üzere nizâmımız verilmişiken hâlâ mesfûr Hürmüz zimmî dâimâ hilâf-ı [86a] nizâm ve mugāyir-i emr-i âlî nesc eylediği kutnîyi altı bin telden sekiz yüzünü noksan nesc edip kālıb işlemek ile nizâm-ı kadîmimize halel verip hatta nesc için destgâhına çekdiği işbu mu‘âyene olunan kutnî sekiz yüz tel noksan ve kālıbdır deyü bi’l-muvâcehe herbiri teşekkî ve mesfûr Hürmüz’ün san‘at-ı mezkûreyi işlememek ile ta‘zîr ve tedîb olunması için fermân-ı âlî istirhâm eyledikleri Mahkeme-i Bâb’dan huzûr-ı âlîlerine i‘lâm olundu ma‘lûm-ı âsafâneleri buyruldukda emr ü fermân hazret-i veliyyü’l-emrindir. Fî 9 min-Rebî‘ülâhir sene 1163