Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 491 Hüküm no: 659 Orijinal metin no: [86a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Mehmed’in aldığı borca karşılık Hacı Mehmed b. Ahmed’e rehin bıraktığı evin borcunu ödediğinden kendisine iadesi Ma‘rûz Zâtı ta‘rîf-i şer‘î ile mu‘arrefe olan sahibe-i arzuhâl Fâtıma bt. Mehmed meclis-i şer‘de el-Hâc Mehmed b. Ahmed muvâcehesinde zikri câ’î vakfın ber-vech-i meşrûta mütevellîsi olan Molla Mehmed hazır olduğu hâlde ashâb-ı hayrâtdan merhûm el-Hâc Mustafa Efendi’nin şeyhü’l-kurrâya vakfı musakafâtından bi’l-icâreteyn taht-ı tasarrufumda olup İstanbul’da Balcı mahallesinde vâki‘ ma‘lûmü’l-hudûd bir bâb menzilimi bi-tarîkı’l-vefâ bâ-ma‘rifet-i mütevellî yüz guruş deynim mukābelesinde mezbûr el-Hâc Mehmed’e yüz altmış bir Receb-i şerîf’inin yirmi beşinci günü ferâğ ve tefvîz ol dahi ba‘de’t-tefevvüz ve’l-kabûl târih-i i‘lâmdan on iki gün mukaddem meblağ-ı mezbûr yüz guruşun altmış guruşunu mezbûr el-Hâc Mehmed’e edâ ve teslîm etmişidim hâlâ bâkī kalan kırk guruşu kendiye teslîm ile menzil-i mezkûru bâ-ma‘rifet-i mütevellî istirdâd murâd ederim deyü ba‘de’d-da‘vâ ve’s-suâl mezbûr el-Hâc Mehmed fi’l-hakīka meblağ-ı mezbûr yüz guruş mukābelesinde bi-tarîkı’l-vefâ bâ-ma‘rifet-i mütevellî müdde‘iye-i mezbûre Fâtıma menzil-i mezkûrunu ferâğını ikrâr lâkin altmış guruşu ahzını ba‘de’l-inkâr müdde‘iye-i mezbûre ber-vech-i muharrer müdde‘âsını lede’t-tezkiye adâletleri zâhir olan Manav Nu‘man b. Mehmed ve Derviş el-Hâc Mehmed b. Halil şehâdetleriyle mezbûr el-Hâc Mehmed muvâcehesinde vech-i şer‘î üzere ba‘de’l-isbât meblağ-ı bâkī-i mezbûr kırk guruşu dahi meclis-i şer‘de mezbûr el-Hâc Mehmed’e def‘ ve teslîm etmekle menzil-i mezkûru bâ-ma‘rifet-i mütevellî yine müdde‘iye-i mezbûre Fâtıma’ya ferâğ ve tefvîze mezbûr el-Hâc Mehmed’e tenbîh olunduğu Mahkeme-i Bâb’da tescîl ve huzûr-ı âlîlerine i‘lâm olundu. Fî 9 Rebî‘ülâhir sene 1163