Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 492 Hüküm no: 660 Orijinal metin no: [86a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hocapaşa mahallesinden Mustafa Ağa b. Hüseyin’in şikayetçi olduğu Berber Mehmed Çelebi b. Hasan’dan ahalinin memnun ve her haline kefil olduklarını beyan etmeleri üzerine davanın reddedildiği Ma‘rûz Derûn-ı arzuhâlde mezkûr Hocapaşa mahallesi sükkânından arzuhâl sahibi Mustafa Ağa b. Hüseyin yine mahalle-i mezbûre sükkânından olup İbrahim Çavuş kulları mübâşeretiyle meclis-i şer‘-i envere ihzâr olunan Berber Mehmed Çelebi b. Hasan nâm kimesne muvâcehesinde mezbûr Berber Mehmed Çelebi mahalle-i mezbûrede sâkin olduğu menzili kapısı köşesine tarîk-ı âmda hasırdan bir berber kulübesi tutup berberlik işleyip lâkin mezbûrun kulübesi benim menzilimin tarîk-ı âmma nâzır olan penceresinin cânib-i yesârında olup kulübesine traş olmak için gelen kimesneler pencereme belki bakarlar emniyetim yokdur men‘ u def‘ olunması matlûbumdur deyü mezbûr Berber Mehmed Çelebi’den teşekkî eyledikde mahalle-i mezbûre ahâlîsinden civârında sâkinler olup meclis-i şer‘-i envere hâzırûn olan İmâm Mustafa Efendi b. Halil ve Za‘îm Ahmed Ağa b. Mehmed ve Mehmed Ağa b. Mustafa ve el-Hâc Osman ve Hasan Çelebi ve Süleyman Ağa ve el-Hâc Abdullah ve İbrahim ve Hacı Yusuf ve el-Hâc İbrahim ve İbrahim Çelebi ve el-Hâc Mehmed ve Hacı Ali ve el-Hâc Yahya nâm kimesnelerden istikşâf-ı hâl için mezbûr Berber Mehmed Çelebi’nin keyfiyet-i hâli istintâk olundukda mezbûr Berber Mehmed Çelebi kadîmden mahallemiz sükkânından olup kendi hâlinde ve ırzıyla mukayyed ve pîr ve ihtiyâr ve fakīrü’l-hâl olmağla mahalle-i mezbûrede vâki‘ menzili köşesine çatdığı hasırdan berber kulübesinin mezbûr Mustafa Ağa’ya ve bize ve sâir mârreye kat‘a zararı yokdur deyü ba‘de’l-ihbâr mezbûr Mehmed Çelebi’den cümlemiz emîn ve hoşnûd ve râzılarız deyü ve mezbûrun her hâline mütekeffilleriz deyü hüsn-i hâlini dahi herbiri ihbâr etmeleriyle mezbûr Mustafa Ağa’nın tesâddî eylediği da‘vâsı ta‘annüt olup meşrû‘â olmamağın mezbûr Berber Mehmed Çelebi’ye husûs-ı mezkûrda bî-vech mu‘ârazadan men‘ olunduğu Mahkeme-i Bâb’dan huzûr-ı âlîlerine i‘lâm olundu. Fî 6 Rebî‘ülâhir sene 1163