Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 80 Hüküm no: 77 Orijinal metin no: [16a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aci İstefani ile kardeşi Frankovilo’nun ortaklaşa sahip oldukları odayı Bakkal Kostandi’ye satıkları Medîne-i Üsküdar’a muzâfe Adalar nâhiyesine tâbi‘ Pendik karyesinde mütemekkin Aci İstefani v. Hıristodoli kendü nefsinden asıl ve li-ümmin er karındaşı Frankovilo v. Yamandi zimmî tarafından ber-vech-i âti’l-beyanda vekîl olduğu Aci Yorgi v. Todori ve Fıçıcı Piro v. Kiryako zimmîler şehâdetleriyle vekâleti sâbit olup vekâleten meclis-i şer‘-i hatîr-i lâzimü’t-tevkīrde eniştesi işbu râfi‘ü’r-rakīm Bakkāl Kostandi v. Esteryos zimmî muvâcehesinde ikrâr ve takrîr-i kelâm edüp akd-i âti’z-zikrin sudûruna değin ale’l-iştirâki’s-seviy karındaşım merkūm Frankovilo ile yedimizde mülkümüz olup karye-i mezbûrede vâki‘ iki tarafı bizim bahçe ve menzilimiz ve bir tarafı arsa-i hâliyemiz ve bir tarafı bahçe ve menzilimize müntehî tarîk-i hâs ile mahdûd tahtânî bir bâb mülk odayı ve tûlen ve arzen bi-hesâb-ı terbi‘î on beş zirâ‘ arsasıyla tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile müşterî-i merkūma yüz on guruşa bey‘ u teslîm ve temlîk eylediğimizde ol dahi ber-vech-i muharrer iştirâ ve tesellüm ve temellük ve kabz u kabûl eyledikden sonra semeni olan meblağ-ı mezkûr yüz on guruşu müşterî-i merkūm yedinden her birimiz bi-kadri’l-hısas tamâmen ahz ü kabz eyleyüp fîmâ-ba‘d mârrü’z-zikr odada vechen mine’l-vücûh ve sebeben mine’l-esbâb kat‘â ve kātıbeten benim ve müvekkilim merkūmun alâka ve medhalimiz kalmayup müşterî-i merkūmun tarîk-i hâs müştereken mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fi’r-râbi‘ aşer min-Saferi’l-hayr li-seneti semânîn ve mi’ete ve elf. Şuhûdü’l-hâl: Molla Hüseyin b. Veli, Berber Mehmed Emin b. Hüseyin, Berber Memiş Beşe b. Veli, Nalband Zekeriya b. Mehmed. el-Hâc Süleyman b. Ahmed, Halil Beşe b. Ahmed. Kirkor v. Manos, Encilo v. Todori, Aci Londari v. Vasilikos, Dimitri v. Atana, Lazkari v. Kosta, Moralı Todori v. Yorgi, Aci Simoni v. Eksoderi zimmî. El-emrü hasbemâ hürrire fîhi nemekahü’l-fakīr ileyhi azze şânuhu Ahmed el-müvellâ hilâfeten bi-medîneti Galata el-mahrûse