Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 493 Hüküm no: 661 Orijinal metin no: [86a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Ayşe bt. Seyyid Mustafa ile Hıdır v. Yasef’in alacak-verecek davasında sulh olup birbirlerinin zimmetlerini ibra ettikleri Ma‘rûz Zâtı ta‘rîf-i şer‘î ile mu‘arrefe olan sahibe-i arzuhâl Şerife Âişe bt. es-Seyyid Mustafa nâm hatun meclis-i şer‘-i hatîr <>de derûn-ı arzuhâlde ismi mezkûr olup Mustafa Çavuş kulları mübâşeretiyle ihzâr ettirdiği Hıdır v. Yasef nâm Yahûdî muvâcehesinde târih-i i‘lâmdan beş sene mukaddem mesfûr Hıdır Yahûdî’ye malımdan karz olmak üzere iki yüz seksen guruş ve kırk guruşa dahi bir altın pendül sâ‘at bey‘ eyleyip hâlâ mesfûr Hıdır Yahûdî’nin zimmetinde ciheteyn-i mezkûreteynden üç yüz yirmi guruş hakkım müctemi‘ olmağla meblağ-ı mecmû‘-ı merkūmu mesfûr Hıdır Yahûdî’den taleb ve da‘vâ eylediğimde ol dahi külliyyen inkâr eylediğinden mâ‘adâ bir husûsun temşiyeti için sana dört yüz yirmi guruş vermişidim deyü benden da‘vâya tesâddî edip beynimizde münâza‘ât-ı kesîre cereyân etmişidi el-hâletü hâzihî bâ-tavassut-ı muslihîn da‘vâ-yı mezkûremden mesfûr Hıdır Yahûdî ile an-inkâr yirmi guruş bedel-i makbûza sulh olup mâ‘adâ üç yüz guruşa ve târih-i i‘lâma gelince hukūk-ı sâireye müte‘allika âmme-i da‘vâdan mesfûr Hıdır Yahûdî’nin zimmetini ibrâ-i âm ile ibrâ ve ıskāt eylediğimde ol dahi bedel-i sulh olmak üzere medfû‘u olan [86b] yirmi guruşa ve müdde‘âsı olan dört yüz yirmi guruşa ve târih-i i‘lâma gelince hukūk-ı sâireye müte‘allika âmme-i da‘vâdan benim zimmetimi ibrâ-i âm ile ibrâ ve ıskāt eyledikde herbirimiz âharın ibrâsını kabûl ile kat‘-ı nizâ‘ eyledik birbirimiz[le] kat‘a da‘vâ ve nizâ‘ımız yokdur deyü olan ikrârını mesfûr Hıdır Yahûdî dahi tasdîk eylediği Mahkeme-i Bâb’dan huzûr-ı âlîlerine i‘lâm olundu el-emrü li-men-lehu’l-emr. Fî 9 Rebî‘ülâhir sene 1163