Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 493 Hüküm no: 662 Orijinal metin no: [86b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avanis v. Uskor’un parasını çaldığı iddiasıyla İsmail b. Mustafa’ya açtığı davayı ispat edemediği Ma‘rûz İstanbul’da Tahtakale’de vâki‘ iskelede nân-ı azîz bey‘ eden sahib-i arzuhâl Avanis v. Uskor zimmî meclis-i şer‘de derûn-ı arzuhâlde mezkûrü’l-ism olup Subaşı el-Hâc Mehmed kulları mübâşeretiyle ihzâr-ı şer‘ olunan es-Seyyid el-Hâc İsmail b. Mustafa muvâcehesinde târih-i i‘lâmdan yirmi iki gün mukaddem zikrolunan iskelede mevcûd piştahtam derûnunda bir beyaz kîsede olan yüz kırk guruşumu merkūm es-Seyyid el-Hâc İsmail gelip yanıma oturup hufyeten bi-gayr-ı hakkın ahz etmekle meblağ-ı mezbûru merkūm es-Seyyid el-Hâc İsmail’den taleb ederim deyü ba‘de’d-da‘vâ ve’l-inkâr müdde‘î-i mesfûr Avanis zimmî ber-vech-i muharrer müdde‘âsını isbât için ba‘de’l-istimhâl ve’l-imhâl müddet-i mehl tamam olup ityân-ı beyyineye kādir olmamağla merkūm es-Seyyid el-Hâc İsmail bi’t-taleb ba‘de’t-tahlîfi’ş-şer‘î mûcebiyle müdde‘î-i mesfûr Avanis zimmî mezbûr es-Seyyid el-Hâc İsmail’e bilâ-beyyine bî-vech mu‘ârazadan men‘ olunduğu Mahkeme-i Bâb’da tescîl ve huzûr-ı âlîlerine i‘lâm olundu bâkī fermân men-lehu’l-emr hazretlerinindir. Fî 10 min-Rebî‘ülâhir sene 1163