Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 494 Hüküm no: 663 Orijinal metin no: [86b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Emine ve Şerife Hatice hatunların vefat eden babaları Seyid Hasan b. Ömer’in vefaen sattığı menzilin geri verilmesi talebiyle Molla Süleyman’a açtıkları davada sulh olup birbirlerinin zimmetlerini ibra ettikleri Ma‘rûz İstanbul’da Mevlevîhâne Yenikapısı kurbünde Hasırcı mahallesi ahâlîsinden iken bundan akdem vefât eden es-Seyyid Hasan b. Ömer’in hasran vâriseleri olan sulbiye kebîre kızları olup zâtları Mustafa Beşe b. Ömer ve Ali Beşe b. Ahmed ta‘rîfleriyle mu‘arrefeler olan Şerife Emine <> ve Şerîfe Hadîce nâm hatunlar meclis-i şer‘de derûn-ı arzuhâlde mezkûrü’l-ism Molla Süleyman muvâcehesinde babamız müteveffâ-yı mezbûr es-Seyyid Hasan hayatında bi’l-icâreteyn mutasarrıf olduğu mahalle-i mezbûre avârızına mevkūfe olup yine mahalle-i mezbûrede vâki‘ ma‘lûmü’l-hudûd ve’l-müştemilât bir bâb sagīr menzili târih-i i‘lâmdan sekiz sene mukaddem babamız mezbûr yirmi bir guruş deyni mukābelesinde ferâğ-ı vefâ ile bâ-ma‘rifet-i mütevellî mezbûr Süleyman’a ferâğ ve tefvîz etmekle hâlâ meblağ-ı mezbûr yirmi bir guruşu mezbûr Süleyman’a edâ ve menzil-i mahdûd-ı mezkûrunu istirdâd murâd ederiz deyü da‘vâya tesâddî eylediğimizde ol dahi ferâğ-ı kat‘î deyü ba‘de’l-münâza‘a bâ-vesâtet-i muslihîn mezbûr Molla Süleyman ile da‘vâ-yı mezkûremizden on sekiz guruş bedel-i makbûza sulh olup menzil-i mahdûd-ı mezkûra ve bedel-i sulh-ı mezbûra müte‘allika âmme-i da‘vâdan herbirimiz âharın zimmetini ibrâ-i âm ile ibrâ ve ıskāt eyledik fîmâ-ba‘d menzil-i mezkûra müte‘allika kat‘a da‘vâ ve nizâ‘ımız yokdur deyü olan ikrârlarını mezbûr Süleyman tasdîk eylediği Mahkeme-i Bâb’dan huzûr-ı âlîlerine i‘lâm olundu. Fî 10 min-Rebî‘ülâhir sene 1163