Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 494 Hüküm no: 664 Orijinal metin no: [86b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa b. Kasım’ın daha önce sulh oldukları İstoraki v. Hürmüz’e sulh bedelinden kalan borcunu ödemesi için yapılan tenbih Ma‘rûz Derûn-ı arzuhâlde mezkûrü’l-ism olup mahmiye-i İstanbul’da Balıkpazarı’nda bakkāl olan İstoraki v. Hürmüz nâm zimmî meclis-i şer‘-i hatîrde sahib-i arzuhâl Hüseyin Ağa b. Kasım muvâcehesinde bundan akdem mezbûr Hüseyin Ağa işbu yedime verdiği bir kıt‘a deyn temessüğü mantûkunca zimmetinde altı zirâ‘ çuka semeninden on sekiz guruş ve revgan-ı sâde ve pirinç ve sâir zehâir bahâsından dahi yetmiş yedi buçuk guruş ki min-haysü’l-mecmû‘ doksan beş buçuk guruş hakkım olmağla meblağ-ı mecmû‘-ı merkūmu mezbûr Hüseyin Ağa’dan taleb ve da‘vâ sadedinde olduğumda ba‘de’l-münâza‘a beynimize muslihûn tavassut edip da‘vâ-yı mezkûremden mezbûr Hüseyin Ağa ile seksen guruş bedel mukābelesinde sulh olup mâ‘adâsı olan on beş buçuk guruşa müte‘allika âmme-i da‘vâdan mezbûr Hüseyin Ağa’nın zimmetini ibrâ ve ıskāt eylediğimde ol dahi ibrâyı ba‘de’l-kabûl bedel-i sulh-ı mezkûr seksen guruşun otuz guruşunu işbu meclis-i şer‘de bana def‘ ve teslîm eyleyip elli guruşu zimmetinde bâkī kalmağla meblağ-ı bâkī-i mezkûr elli guruşu mezbûr Hüseyin Ağa’dan taleb ederim deyü ba‘de’d-da‘vâ ve’l-istintâk mezbûr Hüseyin Ağa cevâbında fi’l-hakīka müdde‘î-i mesfûra bedel-i sulh-ı mezkûrdan bâkī zimmetinde elli guruş deyni olduğunu ikrâr ve i‘tirâf etmeğin alâ-mûceb-i i‘tirâfihî meblağ-ı bâkī-i mezkûr elli guruşu müdde‘î-i mesfûr İstoraki zimmîye edâ ve teslîme mezbûr Hüseyin Ağa’ya tenbîh olunduğu Mahkeme-i Bâb’dan mübâşirleri Kapıkethudâsı İsmail Beşe kulları ile huzûr-ı âlîlerine i‘lâm olundu. Fî 11 Rebî‘ülâhir sene 1163