Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 496 Hüküm no: 666 Orijinal metin no: [87a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pakize Hanım bt. Ahmed Bey’in, iki at ve bazı eşyalarını kendisinin rızası olmadan ölen kocası Mahmud Bey’in Mehmed Bey b. Hacı Hasan’a sattığından bedelinin ödenmesi talebiyle açtığı davada sulh olup Mehmed Bey’le birbirlerinin zimmetlerini ibra ettikleri Bâ-mühr-i hazret-i efendi Ma‘rûz Sahibe-i arzuhâl Pakize Hanım bt. el-Hâc Ahmed Bey zâtı ba‘de’t-ta‘rîfi’ş-şer‘î dîvân-ı âlîlerinde ma‘kūd meclis-i şer‘de Mehmed Bey b. el-Hâc Hasan muvâcehesinde zevcim olup bundan esbak fevt olan Mahmud Bey b. Ahmed nâm kimesne hayatında benim yedimde mülk ve hakkım olan mecmû‘u beş yüz on guruş kıymetli bir re’s doru at ve bir re’s kır at ve iki aded sîm kemer raht ve iki aded sîm rişme ve bir mercan tesbihimi benden izinsiz bi-gayr-ı hakkın ma‘lûmü’l-mikdâr deyni mukābelesinde işbu Mehmed Bey’e verip ve ben mücîze dahi olmadığımdan eşyâ-i mezkûrenin aynıları bâkī ise aynılarını müstehlek ise kıymetlerini işbu merkūm Mehmed Bey’den taleb ederim deyü tesâddî eylediğim da‘vâmdan ba‘de vukū‘ı’l-münâza‘a tavassut-ı muslihûn ile işbu meclis-i şer‘de makbûz yüz otuz yedi buçuk guruş bedel mukābelesinde sulh olup ba‘de’l-yevm husûs-ı mezkûra ve sâire târih-i i‘lâma gelince ahz u i‘tâya müte‘allik âmme-i de‘âvî ve mutâlebât ve kâffe-i eymân ve muhâsamâtdan merkūm Mehmed Bey’in zimmetini ibrâ-i âm ile ibrâ ve ıskāt eylediğimde ol dahi bana medfû‘u olan yüz otuz yedi buçuk guruşa ve cihet-i kefâletden müdde‘âsı olan seksen guruşa ve sâir kezâlik târih-i i‘lâma gelince ahz u i‘tâya müte‘allik âmme-i da‘vâdan benim zimmetimi ibrâ-i âm ile ibrâ ve ıskāt edip fîmâ-ba‘d herbirimizin âhar ile vechen mine’l-vücûh ve sebeben mine’l-esbâb kat‘a da‘vâ ve nizâ‘ ve husûmetimiz yokdur dediğini merkūm Mehmed Bey dahi tasdîk edip bu vechile kat‘-ı nizâ‘ eyledikleri huzûr-ı âlîlerine i‘lâm olundu. Fî 9 Rebî‘ülâhir sene 1163