Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 496 Hüküm no: 667 Orijinal metin no: [87a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Efendi b. Ömer’in terekesinden bazı eşyaları haksız yere aldığı iddiasıyla varislerin Halil Efendi b. Abdurrahman’a açtıkları davada sulh oldukları Ma‘rûz Mahmiye-i İstanbul’da Çıkrıkcı Kemâl mahallesi ahâlîsinden olup Canik muhassılı el-Hâc Ahmed Ağa’nın kâtibi iken bundan akdem Canik’de vefât eden Osman Efendi b. Ömer b. Abdullah’ın verâseti zevce-i menkûha-i metrûkesi Fâtıma bt. Abdullah ile kebîr oğlu Hüseyin ve sagīr oğlu Osman ve sagīre kızı Emine’ye münhasıra olduğu lede’ş-şer‘i’l-enver zâhir ve mütehakkık oldukdan sonra zâtı ta‘rîf-i şer‘î ile mu‘arrefe olan kendi nefsinden asâleten ve evlâd-ı sıgār-ı mezbûretân Osman ve Emine’nin kıbel-i şer‘den mansûbe vasîleri olmağla vesâyeten ve mezbûr Hüseyin asâleten meclis-i şer‘de derûn-ı arzuhâlde mezkûrü’l-ism Halil Efendi b. Abdurrahman mahzarında mûrisimiz müteveffâ-yı mezbûrun hîn-i fevtinde yanında mevcûd terekesinden doksan yedi guruş kıymetli bir sîm devât ve elli guruş kıymetli bir pendül sâ‘atimi Kapıcıbaşı Ahmed Ağa’nın oğlu Süleyman Bey’den mezbûr Halil Efendi bi-gayr-ı hakkın ahz etmişidi hâlâ eşyâ-yı mezkûrenin aynıları mevcûde ise aynılarını müstehleke ise ba‘de’s-sübût kıymet-i şer‘iyelerini mezbûr Halil Efendi’den bi’l-asâle ve bi’l-vesâye taleb ederiz deyü da‘vâya tesâddî eylediğimde ol dahi bi’l-külliye inkâr edip biz müdde‘âmızı bir vechile beyâna kādirler olmayıp mezbûr Halil Efendi’nin dahi yemîn edeceği indimizde mütehakkık olmağın sulh sagīrân-ı mezbûrân haklarında her vechile evlâ ve enfa‘ olmağla bâ-vesâtet-i muslihîn da‘vâ-yı mezkûrumuzdan mezbûr Halil Efendi an-inkâr dokuz guruş on para bedel-i makbûza sulh olup husûs-ı mezkûra müte‘allika âmme-i da‘vâdan mezbûr Halil Efendi’nin zimmetini bi’l-asâle ibrâ ve ıskāt eyledik deyü olan ikrârlarını mezbûr Halil Efendi tasdîk eylediği Mahkeme-i Bâb’dan huzûr-ı âlîlerine i‘lâm olundu. [Fî] 10 Rebî‘ülâhir sene 1163