Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 497 Hüküm no: 668 Orijinal metin no: [87a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yedekçi Halil b. Hüseyin’in Berber Ali b. Abdülkadir ile çırağı İbrahim b. Ahmed’e emanet bıraktığı eşyalarının iadesi için yapılan tenbih Ma‘rûz İstanbul’da Ayasofya-i Kebîr mahallesinde vâki‘ kolluk kurbünde sâkin Berber Ali b. Abdülkadir meclis-i şer‘de şâkirdi olup Kapıkethudâsı İsmail Beşe mübâşeretiyle ihzâr-ı şer‘ ettirdiği İbrahim b. Ahmed muvâcehesinde sahib-i arzuhâl Yedekçi Halil b. Hüseyin hazır olduğu hâlde mezbûr Yedekçi Halil bundan akdem eşyâ-i memlûkesinden mezbûr İbrahim’in arkasında hâlâ lâbis olduğu bir al çuka biniş ve bir mavi çuka dolama ve bir kutnî entâri ve bir harîr kuşak ve bir çuka çakşır ve bir sof çakşır ve bir kutnî yelek ve bir keremsûd kaftan ve bir fes ve bir destmâl yemenîni bi-tadîkı’l-emâne def‘ ve teslîm etmekle ben dahi ber-vech-i muharrer ba‘de’l-ahz sâkin olduğum berber dükkânımda mevcûd iken târih-i i‘lâmdan iki gece mukaddem vakt-i mağribde câmi‘de iken şâkirdim mezbûr İbrahim zikrolunan eşyâlarını dükkânımdan bi-gayr-ı hakkın hufyeten ahz etmekle mezbûr İbrahim’den taleb ederim deyü ba‘de’d-da‘vâ ve’s-suâl mezbûr İbrahim cevâbında fi’l-hakīka zikrolunan eşyâları ahzını ikrâr lâkin mezbûr Berber Ali eşyâ-i mezkûrlar kendi malı olmak üzere bana hîbe ve teslîm eyledi deyü ba‘de’d-def‘ ve’l-inkâr mezbûr İbrahim ber-vech-i muharrer def‘ini beyâna kādir olmamağla mezbûr Berber Ali bi’t-taleb ba‘de’t-tahlîfi’ş-şer‘î mûcebiyle eşyâ-i mezkûreyi hâzır-ı mezbûr Yedekçi Halil’e def‘ ve teslîme mezbûrân Berber Ali ile İbrahim’e tenbîh olunduğu Bâb’dan huzûr-ı âlîlerine i‘lâm olundu. Fî 12 Rebî‘ülâhir sene 1163