Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 85 Hüküm no: 54 Orijinal metin no: [13b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zile’nin İğdir köyü camii imamet cihetinin Seyyid Ahmed Halîfe’ye tevcihi Ma‘rûz-ı dâ‘î-i Devlet-i aliyyeleridir ki, Zile kazâsına tâbi‘ İğdir nâm karyede vâki‘ câmi‘-i şerîfin imâmet ciheti mezbûr Seyyid Esad Halîfe’nin üzerinde olduğu askerî rûznâmçesinden derkenâr olunmağla meâl-i derkenâra nazaran bilâ-veled fevti vâki‘ midir vilâyetlüsünden Dersa‘âdet’de bulunan mevsûku’l-kelim kimesnelerden bi’t-tahkīk muktezâsı i‘lâm olunmak bâbında sâdır olan fermân-ı âlîşâna imtisâlen kazâ-i mezbûr ahâlîsinden Dersa‘âdet’de bulunan bî-garaz erbâb-ı vukūfdan ve Asâkir-i Bahriye çavuşlarından Ahmed b. Ömer ve Mehmed b. Mahmud nâm kimesneler meclis-i şer‘a celb ile keyfiyeti gereği gibi etrâfıyla suâl olundukda inhâ ve istid‘â olunduğu üzere mezbûr es-Seyyid Esad’ın bilâ-veled fevti vâki‘ ve sahib-i arzuhâl merkūm Seyyid Ahmed Halîfe vücûhla ehil ve mümtâz-ı cemâ‘at olduğunu herbiri alâ-tarîkı’ş-şehâde ihbâr etmeleriyle bu sûretde imâmet-i mezkûre müteveffâ-yı mezbûr Seyyid Esad Halîfe’nin bilâ-veled mahlûlünden varıp câmi‘-i mezkûrda bi’n-nefs edâ-i hizmet eylemek ve bedel ile kasr-ı yedine amel ve i‘tibâr olunmayıp hizmet-i lâzımesinde terk ve tekâsülü vukū‘a gelir ise ref‘inden âhara verilmek şartıyla ehil ve mümtâz-ı cemâ‘at idiği ihbâr olunan merkūm Seyyid Ahmed Halîfe’ye tevcîh ve kaleminden beratı i‘tâ olunmak iktizâ eylediği huzûr-ı âlîlerine i‘lâm olundu. Fî 15 Za sene [12]48