Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 85 Hüküm no: 55 Orijinal metin no: [13b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Burdur’un el-Hâc Ömer mahallesinde Hekime Hatun’un vakfettiği ev harap olduğundan Hacı Hüseyin Köprüsü’nde bulunan bağ ile değiştirildiği Ma‘rûz, Sâdır olan fermân-ı âlîlerine imtisâlen işbu i‘lâm ve derkenâra nazar olundu[kd]a Tîrkeş Hâssı kazâlarından Burdur kazâsında el-Hâc Ömer mahallesinde vâki‘ merhûm Hekîme Hatun sahibü’l-hayrın galle ve tevliyeti sulehâya meşrûta vakf-ı müsecceli olan ma‘lûmü’l-hudûd ve’l-müştemilât bir bâb menzile bâ-hüccet-i şer‘iye tevcîh-i hâkimü’ş-şer‘le mutasarrıf ve vakf-ı mezkûrun mütevellîsi olan el-Hâc Ebûbekir Efendi b. Osman mahâllinde meclis-i şer‘a varıp menzil-i mezkûr gāyet harâb olduğundan istîcara kimesne tâlib olmayıp ta‘mîre vâfî âhar mal-ı vakf dahi olmamağla menzil-i mezkûru kazâ-i mezbûrda Hacı Hüseyin Köprüsü nâm mahâlde kâin Ümmühan nâm hatunun mülkü olan ma‘lûmü’l-hudûd mülk bir kıt‘a bağ ile istibdâl murâd eylediklerinde taraf-ı şer‘den kâtib ve ümenâ-i şer‘ irsâliyle evvelâ menzil-i mevkūf-ı mezkûr ve sâniyen bağ-ı memlûk-i mezkûr ebniye ve sukūf ahvâline vukūf-ı tâmmı olan bî-garaz kimesneler ma‘rifetleriyle keşf ve mu‘âyene ettirildikde akār-ı memlûk-i mezkûr akār-ı mevkūf-ı mezkûrdan kıymeten ve rağbeten ve ücreten ve mahallen ezyed ve evfer ve istibdâli vakf-ı şerîfe enfa‘ ve evlâ olduğu zâhir ve mütehakkık ve ol vechile şurût-ı istibdâl mevcûde olduğu beyânıyla ber-vech-i muharrer istibdâle izn-i hümâyûnu müş‘ir bir kıt‘a emr-i celîlü’ş-şân sudûru istid‘â olunduğu meâl-i i‘lâmdan müstebân olmağın bu sûretde şerâit-i şer‘iyesine ri‘âyet olunmuş olduğundan istibdâli tecvîz eyleyen fukahâ-yı zevi’l-ibtihâcın kavilleri üzere mülk olan bağ-ı mezkûr vakıf ve vakıf olan harâb menzil-i mezkûr mülk olmak ve vakf-ı evvelin şurûtu vakf-ı sânîde icrâ olunmak üzere tarafeyne cihet-i şer‘iye verilmek için şurûtu mûcebince emr-i âlîşân sudûru muvâfık-ı irâde-i seniyyeleri ise ol bâbda emr ü fermân hazret-i veliyyü’l-emrindir. Fî-selhi Ca sene [12]48