Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 498 Hüküm no: 670 Orijinal metin no: [87b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanaki v. Hristo’nun Yuvan v. Todoş’da sulh bedelinden kalan alacağının ödenmesine yapılan tenbih Ma‘rûz Derzi tâifesinden sahib-i arzuhâl Yanaki v. Hristo nâm zimmî meclis-i şer‘de derûn-ı arzuhâlde mastûrü’l-ism Yu[van] v. Todoş nâm zimmî muvâcehesinde mesfûr Yuvan zimmî zimmetinde cihet-i karz-ı şer‘îden yirmi iki guruş ve yedimden iştirâ ve kabz eylediği ma‘lûmü’l-aded hasır semeninden on yedi guruş ve bir çekisi otuz birer paraya olmak üzere iki yüz yirmi dört çeki odun semeninden yüz yetmiş üç buçuk guruş dört para ki cem‘an iki yüz on iki buçuk guruş dört para hakkım olmağla meblağ-ı mezkûrdan elli beş guruşunu bundan akdem mesfûr Yuvan yedinden ahz u kabz etmişidim bâkī yüz elli yedi buçuk guruş dört para hakkımı mesfûr Yuvan zimmîden taleb ederim deyü tesâddî eylediğim da‘vâmdan bâ-vesâtet-i muslihîn elli beş guruş üzerine sulh olup mâ‘adâsına müte‘allika âmme-i da‘vâdan mesfûr Yuvan’ın zimmetini ibrâ ve ıskāt eyledim hâlâ bedel-i sulh olan meblağ-ı mezkûr elli beş guruşu mesfûr Yuvan zimmîden taleb ederim deyü da‘vâ eyledikde ol dahi fi’l-hakīka bedel-i sulh-ı mezkûrdan elli beş guruş zimmetinde müdde‘î-i merkūma deyni olduğunu ikrâr ve i‘tirâf etmeğin mûcebiyle bedel-i sulh olan meblağ-ı mezkûr elli beş guruşu müdde‘î-i merkūm Yanaki zimmîye edâ ve teslîme mesfûr Yuvan zimmîye tenbîh olunduğu Mahkeme-i Bâb’dan huzûr-ı âlîlerine i‘lâm olundu. Fî 15 Rebî‘ülâhir sene 1163