Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 499 Hüküm no: 671 Orijinal metin no: [87b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Resuh bt. Pedros’un kiracısı olan damadı Rüstem v. Kirkor ile kira bedeli ve alacak davasında sulh olup birbirlerinin zimmetlerini ibra ettikleri Ma‘rûz İstanbul’da Sultanhamamı kurbünde Ali Paşa-yı Atîk mahallesi mütemekkinlerinden olup şahsı Asba v. Papa Kan ve Avanis v. Zora nâm zimmîler ta‘rîfleriyle mu‘arrefe olan sahibe-i arzuhâl Resuh bt. Pedros nâm Nasrâniye bi’t-terâzî Mahkeme-i Bâb’da meclis-i şer‘de derûn-ı arzuhâlde mastûr dâmadı Rüstem v. Kirkor muvâcehesinde mahalle-i mezbûrede vâki‘ bir bâb menzilimde mesfûr Rüstem beher mâh ikişer guruş icâre kavliyle yedi sene sâkin olmağla sinîn-i mezkûrede icâre-i müte[‘ayyine]den mesfûr Rüstem zimmetinde müctemi‘ olan yüz altmış sekiz guruşu mesfûr Rüstem zimmîden taleb ve da‘vâ eylediğimde ol dahi karz-ı şer‘îden iki yüz on guruş zimmetinde hakkım vardır deyü benden taleb ve da‘vâ etmekle beynimizde nizâ‘-ı küllî cereyân etmişidi el-hâletü hâzihî bâ-vesâtet-i muslihîn icâre-i mezkûrem da‘vâsından mesfûr Rüstem zimmî ile on beş guruş bedel-i makbûza sulh olup icâre-i mezkûreye müte‘allika âmme-i da‘vâdan mesfûr Rüstem zimmînin zimmetini ibrâ ve ıskāt eylediğimde mesfûr Rüstem zimmî dahi benden matlûbu olan iki yüz on guruş da‘vâsından meccânen fâriğ olup meblağ-ı mezbûra müte‘allika âmme-i da‘vâdan benim ile işbu hazır bi’l-meclis âhar dâmadım Asba’nın ve oğlum gāib ani’l-meclis Simaven zimmînin zimmetlerini ibrâ-i âm ile ibrâ ve ıskāt edip ba‘de’l-yevm birbirimiz ile kat‘a da‘vâ ve nizâ‘ımız kalmadı deyü olan ikrârını mesfûr Rüstem zimmî dahi tasdîk eylediği mübâşirleri Mustafa Çavuş kulları ile huzûr-ı âlîlerine i‘lâm olundu. Fî 16 Rebî‘ülâhir sene 1163