Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 499 Hüküm no: 672 Orijinal metin no: [87b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Unkapanı tüccarlarından Hacı Süleyman’ın buğday bedelinden Mankalya kazasının Adil köyünden Mehmed Bey’de alacağından kalan paranın ödenmesi için yapılan tenbih Bâ-mühr-i hazret-i efendi Ma‘rûz Kapan-ı dakīk tüccârlarından sahib-i arzuhâl es-Seyyid el-Hâc Süleyman meclis-i şer‘de Karadeniz sâhilinde Mankalya kazâsına tâbi‘ Adil karyesi ahâlîsinden Mehmed Bey ile terâfu‘larında târih-i i‘lâmdan iki sene mukaddem tarafımdan Ahmed Yazıcı’yı kazâ-i mezbûr ahâlîlerinin ashâb-ı zehâirinden kendi malım ile zehâir iştirâ ve kabz ve tarafıma irsâl için tevkîl etmişidim ol dahi vech-i muharrer üzere ashâb-ı zehâirden semen-i ma‘lûma iştirâ ve devr ve keyl ve kabz ve cem‘ eylediği altı yüz elli keyl hıntayı karye-i mezbûrede der-mahzen eylediğinden sonra mezbûr Mehmed Bey benim mülküm olan hınta-i mezkûreyi bi-gayr-ı hakkın fuzûlen ahz ve âhara ikişer guruşa bey‘ ve semeni olan bin üç yüz guruşu ba‘de’l-kabz makbûzu olan meblağ-ı mezbûr bin üç yüz guruşdan sekiz yüz guruşunu vekîlim merkūm Ahmed Yazıcı’ya teslîm mâ‘adâ beş yüz guruşu mezbûr Mehmed Bey’in zimmetinde kalmağla meblağ-ı bâkī-i mezbûru merkūm Mehmed Bey’den taleb ederim deyü ba‘de’d-da‘vâ ve’s-suâl mezbûr Mehmed Bey cevâbında merkūm Ahmed Yazıcı’nın iştirâ ve cem‘ eylediği ol mikdâr hıntayı ahz ve âhara beher keylini ikişer guruşa bey‘ ve kabz-ı semen eylediğini ikrâr lâkin zikrolunan altı yüz elli keyl hınta müdde‘î-i merkūm es-Seyyid el-Hâc Süleyman’ın malı olduğu ma‘lûmum değildir dedikde müdde‘î-i mezbûr es-Seyyid el-Hâc Süleyman müdde‘âsını lede’t-tezkiye adâletleri zâhir olan sâlifü’z-zikr Mankalya kasabası ahâlîlerinden mahmiye-i İstanbul’da Kantarcılar sûkunda vâki‘ Ali Paşa Hanı’nda müsâfiren sâkinler Ali Çelebi b. Mustafa ve Süleyman b. İbrahim nâm kimesneler şehâdetleriyle mezbûr Mehmed Bey muvâcehesinde vech-i şer‘î üzere isbât etmeğin mûcebince meblağ-ı bâkī-i mezbûr beş yüz guruşu müdde‘î-i mezbûr es-Seyyid el-Hâc Süleyman’a edâ ve teslîme merkūm Mehmed Bey’e tenbîh olunduğu huzûr-ı âlîlerine i‘lâm olundu. Fî 15 Rebî‘ülâhir sene 1163