Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 503 Hüküm no: 677 Orijinal metin no: [88a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hızır Bey mahallesinden Ahmed ile komşuları Mehmed ve Hatice’nin evlerinin havalelerinden birbirlerine zararı olduğunu iddia ettikleri havalelerini kaldırma sözü vererek sulh oldukları Bâ-mühr-i hazret-i efendi keşifdir Ma‘rûz Fermân-ı âlîlerine imtisâlen kıbel-i şer‘den irsâl olunan keşif nâibimiz İbrahim Efendi dâ‘îleri hâssa mi‘mâr hulefâsından es-Seyyid Feyzullah ve Ali halîfeler ile arzuhâlde mezkûr Hızır Bey mahallesinde vâki‘ Kurrâ Mustafa Efendi Vakfı olan menzilin mutasarrıfı sahib-i arzuhâl Ahmed ve menzil-i mezbûr karşısında sokak aşırı mahalle-i mezbûre ümenâsına meşrûta menzilin dahi ber-vech-i iştirâk mutasarrıfları derûn-ı arzuhâlde ismi mezkûr Mehmed ve zâtı mu‘arrefe olan kız karındaşı Hadîce menzillerinin havâle-i nizâ‘larına varıp huzûr-ı Müslimînde akd-i meclis-i şer‘-i âlî ettikde mezbûr Ahmed meclis-i mezkûrda merkūm Mehmed ile kız karındaşı mezbûre Hadîce muvâcehesinde işbu mezbûrânın menzilleri vüstâsında hâriciyeleri olan bir bâb oda ve sofasında ihdâs eyledikleri beş aded pencerelerinden benim menzilimin vüstâsında makarr-ı nisvân olan bir bâb odama havâlesi ve zarar-bîni olmağla ba‘de’l-mu‘âyene havâlesini def‘e tenbîh olunması matlûbumdur deyü da‘vâya tesâddî eyledikde bâ-vesâtet-i muslihîn mezbûrân Mehmed ve Hadîce merkūm Ahmed’in menziline iktizâ eden havâle ve zararlarını tahta perde ile def‘e rızâlarıyla merkūmân Mehmed ve Hadîce ta‘ahhüd eylediklerinde mezbûr Ahmed’in dahi menzili ulyâsında ihdâs eylediği bir bâb odasının üç aded pencerelerinden mezbûrân Mehmed ve Hadice’nin menzilleri ulyâsında makarr-ı nisvân olan iki bâb odalarına iktizâ eden havâle zararını tahta perde ile def‘e rızâsıyla mezbûr Ahmed dahi ta‘ahhüd edip bu vechile kat‘-ı nizâ‘ eylediklerini mezbûr dâ‘îleri mahâllinde ketb ü tahrîr edip ba‘dehû ümenâ-i şer‘le meclis-i şer‘de inhâ <> ve takrîr eylediği huzûr-ı âlîlerine i‘lâm olundu. Fî 12 min-Rebî‘ülâhir sene 1163