Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 504 Hüküm no: 678 Orijinal metin no: [88b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Abdullah ile Fâtıma bt. Abdullah’ın, Fatma bt. Ali’den haksız yere aldıkları eşyaların bedellerini ödemeleri için yapılan tenbih Bâ-mühr-i hazret-i efendi Ma‘rûz Zâtı ta‘rîf-i şer‘î ile mu‘arrefe olan sahibe-i arzuhâl Fâtıma Hatun bt. Ali dîvân-ı âlîde ma‘kūd meclis-i şer‘de derûn-ı arzuhâlde isimleri mastûre ve zâtları ta‘rîf-i şer‘î ile mu‘arrefân Âişe bt. Abdullah ve Fâtıma bt. Abdullah nâm hatunlar muvâcehelerinde bin yüz altmış iki senesi Recebi’l-ferd’inin yirmi sekizinci günü Zeyrek kurbünde sâkine olduğum menzilimden mezbûretân Âişe ve Fâtıma ber-mûceb-i defter-i müfredât eşyâ-i memlûkemden mecmû‘u altı yüz guruş kıymetli eşyâmı bi-gayr-ı hakkın hufyeten ahz etmeleriyle târih-i mezkûrdan dört ay mürûrunda zikrolunan eşyâları mezbûretândan taleb ve da‘vâ sadedinde olduğumda onlar dahi ikrâr ve eşyâ-i mezkûreden bir şatrancî Hind keremsûdu entâri ve bir işleme şâl kürk kabını bana def‘ ve teslîm edip bâkīsini ihlâk eyledik dediklerinde kıymetleri’çün beynimizde ba‘de vukū‘ı’l-münâza‘a mezbûretân ber-minvâl-i meşrûh ahz ve istihlâk eyledikleri eşyânın kıymeti üç yüz guruş olduğunu huzûr-ı Müslimînde ikrâr ve yedime temessük dahi vermeleriyle meblağ-ı mezbûr üç yüz guruşu mezbûretândan taleb ederim deyü ba‘de’d-da‘vâ ve’s-suâl ve’l-inkâr müdde‘iye-i mezbûre ber-vech-i muharrer müdde‘âsını Seyfullah Ağa b. Abdullah ve el-Hâc Süleyman b. Abdullah şehâdetleriyle mezbûretân Âişe ve Fâtıma hatunlar muvâcehelerinde vech-i şer‘î üzere isbât etmeğin mûcebiyle meblağ-ı mezbûr üç yüz guruşu müdde‘iye-i mezbûre Fâtıma Hatun’a edâ ve teslîme mezbûretân Âişe ve diğer Fâtıma’ya tenbîh olunduğu huzûr-ı âlîlerine i‘lâm olundu. Fî 18 Rebî‘ülâhir sene 1163