Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 505 Hüküm no: 681 Orijinal metin no: [88b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa b. Ahmed’in Sarraf Arakil v. Ağya’ya olan borcunu ödemesi Ma‘rûz Sarrâf tâifesinden sahib-i arzuhâl Arakil v. Ağya meclis-i şer‘de Mustafa Ağa b. Ahmed ile terâfu‘larında mezbûr Mustafa Ağa zimmetinde cihet-i karzdan bâ-temessük iki yüz yetmiş iki guruş hakkımdan bâkī iki yüz elli dokuz guruş hakkım olmağla taleb ederim deyü ba‘de’d-da‘vâ ve’s-suâl mezbûr Mustafa Ağa ber-minvâl-i muharrer müdde‘î-i mesfûra iki yüz elli dokuz guruş cihet-i karzdan zimmetinde deyni olduğunu mukır ve mu‘terif olmağla mûcebince meblağ-ı mezkûr iki yüz elli dokuz guruşun edâsıyla merkūm Mustafa Ağa ilzâm olunduğu Mahkeme-i Bâb’dan huzûr-ı âlîlerine i‘lâm olundu. Fî 19 Rebî‘ülâhir sene 1163