Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 506 Hüküm no: 682 Orijinal metin no: [88b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zâim Silahşör Mehmed Ağa b. Abdullah’ın alacağı olduğu Bostanî Mehmed b. Mustafa ile sulh olduğu Ma‘rûz Sahib-i arzuhâl Za‘îm Silâhşör Mehmed Ağa b. Abdullah b. Abdülmennan’ın tarafından husûs-ı âti’z-zikri ikrâra vekîl olduğu Üsküdarî Ahmed Ağa b. Mehmed ve Bostânî Halil b. Ahmed nâm kimesneler şehâdetleriyle ber-vech-i şer‘î sâbit olan es-Seyyid Mustafa Ağa b. Ahmed meclis-i şer‘-i enverde derûn-ı arzuhâlde mezkûrü’l-ism Bostânî Mehmed [b.] Mustafa muvâcehesinde müvekkilim mezbûr Za‘îm Mehmed Ağa’nın yedinde olan bir kıt‘a deyn temessüğü mantûkunca mezbûr Bostânî Mehmed’den cihet-i karzdan matlûbu olan yetmiş beş guruşu bâ-tavassut-ı muslihîn mezbûr Bostânî Mehmed ile elli guruş bedel-i makbûza sulh olup mâ‘adâsı olan yirmi beş guruşa müte‘allika da‘vâdan mezbûr Bostânî Mehmed’in zimmetini ibrâ ve ıskāt eyledikde ol dahi ibrâyı kabûl ile kat‘-ı nizâ‘ eylediler deyü bi’l-vekâle olan ikrârını mezbûr Bostânî Mehmed dahi tasdîk eylediği Mahkeme-i Bâb’da tescîl ve mübâşirleri Mehmed Haseki kulları ile huzûr-ı âlîlerine i‘lâm olundu. Fî 20 Rebî‘ülâhir sene 1163