Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 506 Hüküm no: 683 Orijinal metin no: [88b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esirci Mehmed Beşe b. Mustafa’nın Mehmed b. Ahmed’den satın aldığı Mahbube’nin taun hastalığından vefat ettiğinden ödediği bedelin bir kısmının geri verilmesi talebiyle açtığı davada haksız bulunduğu Ma‘rûz Esirci tâifesinden sahib-i arzuhâl Mehmed Beşe b. Mustafa nâm kimesne meclis-i şer‘-i enverde derûn-ı arzuhâlde mezkûrü’l-ism el-Hâc Mehmed b. Ahmed nâm kimesne muvâcehesinde târih-i i‘lâmdan iki ay mukaddem mezbûr el-Hâc Mehmed’den cemî‘ uyûbdan sâlime olmak üzere üç yüz otuz guruş semen-i medfû‘ ve makbûza iştirâ eylediğim Gürciyyetü’l-asl Mahbûbe nâm câriye mat‘ûne olup mu‘ayyebe olmağla altı gün mürûrunda [89a] câriye-i mezbûre Mahbûbe vefât etmekle mezbûr el-Hâc Mehmed’den ba‘de’s-suâl noksan semenini taleb ederim deyü da‘vâ eyledikde gıbbe’s-suâl mezbûr el-Hâc Mehmed cevâbında târih-i mezkûrda câriye-i mezbûreyi cemî‘ uyûbdan sâlime olmak üzere üç yüz otuz guruş semen-i medfû‘ ve makbûza müdde‘î-i merkūm Esirci Mehmed Beşe’ye bey‘ eylediğini ikrâr lâkin mat‘ûne olup mu‘ayyebe olduğunu inkâr eyledikde müdde‘î-i merkūm ber-vech-i muharrer müdde‘âsını bir vechile beyâna kādir olmayıp bi’t-taleb mezbûr el-Hâc Mehmed’e vech-i şer‘î üzere yemîn verilip mûcebiyle müdde‘î-i merkūm Esirci Mehmed Beşe bilâ-beyyine-i âdile mezbûr el-Hâc Mehmed’e bî-vech mu‘ârazadan men‘ olunduğu Mahkeme-i Bâb’da tescîl ve mübâşirleri Abdi Çavuş kulları ile huzûr-ı âlîlerine i‘lâm olundu el-emrü li-men-lehu’l-emr. Fi’l-yevmi’l-işrîn min-şehri Rebî‘ülâhir li-sene selâse ve sittîn ve miete ve elf.