Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 512 Hüküm no: 694 Orijinal metin no: [90a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fincancı Ahmed b. Satılmış’ın boşandığı hanımı Aliye bt. İbrahim’e olan nafaka ve mehir bedellerini ödemesine yapılan tenbih Ma‘rûz Zâtı ta‘rîf-i şer‘î ile mu‘arrefe olan sahibe-i arzuhâl Aliye bt. İbrahim nâm hatun meclis-i şer‘-i hatîrde derûn-ı arzuhâlde mezkûrü’l-ism zevc-i sâbıkı Fincâncı Ahmed b. Satılmış nâm kimesne muvâcehesinde zevcim mezbûr Ahmed târih-i i‘lâmdan on gün mukaddem beni bâyinen tatlîk etmekle zimmetinde mütekarrer ve ma‘kūdün-aleyh olan on bin akçe mehrimi ve mezbûrun firâşından hâsıl sekiz aylık hamlim olmağla vaz‘-ı haml ile iddetim münkaziye oluncaya değin nafaka-i iddetimi mezbûr Ahmed’den taleb ederim deyü da‘vâ eyledikde ol dahi cevâbında müdde‘iye-i mezbûre Aliye Hatun zevce-i menkûhası olup târih-i mezkûrda bâyinen tatlîkını ve zimmetinde mütekarrer iki bin iki yüz akçe mehir olduğunu ve firâşından hâsıl sekiz aylık hamlini ikrâr lâkin ziyâde yedi bin sekiz yüz akçe mehrini inkâr ettikde müdde‘iye-i mezbûre Aliye Hatun ziyâde mehir müdde‘âsını beyâna kādire olmayıp bi’t-taleb mezbûr Ahmed’e vech-i şer‘î üzere yemîn verilmeğin mûcebince müdde‘iye-i mezbûre Aliye Hatun bilâ-beyyine ziyâde yedi bin sekiz yüz akçe mehir mutâlebesiyle mezbûr Ahmed’e bî-vech mu‘ârazadan ba‘de’l-men‘ mezbûr Ahmed’in ikrâr ve i‘tirâf eylediği iki bin iki yüz akçe mehri ile bir aylık nafaka-i haml için bi’t-terâzî ta‘yîn olunan üç yüz akçe ki cem‘an iki bin beş yüz akçeyi mezbûre Aliye Hatun’a edâya mezbûr Ahmed’e tenbîh olunduğu Mahkeme-i Bâb’dan huzûr-ı âlîlerine i‘lâm olundu. Fî 26 Rebî‘ülâhir sene 1163