Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 513 Hüküm no: 696 Orijinal metin no: [90a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dikici Ahmed b. Abdülkerim’in alım-satımı tüccarlara ait deriyi nizama aykırı olarak alıp-satmaktan menedildiği Ma‘rûz İstanbul’da vâki‘ tâcir esnâfının kethudâları el-Hâc Ali ve yiğitbaşıları Mustafa Çelebi ve Çizmecibaşı Osman Çelebi ve Dikicibaşı İsmail Çelebi ve tâcirlerden ve bâzergânlarından el-Hâc İbrahim ve es-Seyyid Ali ve Mehmed Çelebi ve es-Seyyid Mehmed Çelebi ve el-Hâc Ahmed ve el-Hâc Hüseyin Efendi ve Ali Beşe ve es-Seyyid Osman ve el-Hâc Mustafa ve Hüseyin Çelebi ve Arab el-Hâc Mehmed ve Mustafa Çelebi ve sâir müseccelü’l-esâmî kimesneler meclis-i şer‘de Kapıkethudâsı Hâfız Osman kulları mübâşeretiyle meclis-i şer‘a ihzâr ettirdikleri dikici esnâfından Ahmed b. Abdülkerim muvâcehesinde metâ‘ımız olan ecnâs-ı sahtiyân berren ve bahren bâzergân ve debbağān yedleriyle Âsitâne-i sa‘âdet’e geldikde gümrüğü edâ olundukdan sonra gümrük emîni ağa ma‘rifetiyle doğru tâcirânın Mercan sûkunda vâki‘ lonca yerine getirilip çizmecibaşı ve dikicibaşı ve tâcirler kethudâsı ve yiğitbaşıları ba‘de’l-müzâyede tâcir esnâfına narh-ı rûzîsi üzere tevzî‘ ve taksîm olunup ecânibden kat‘a kimesne müdâhale etmeyip tâcir esnâfı dahi hufyeten bey‘ ve şirâ etmek ve odalarda ve hanlarda vaz‘ olunmak yedimizde olan emr-i âlî ve nizâm-ı kadîmimiz üzere külliyyen memnû‘ iken esnâfımızda alâkası olmayıp ecânibden olan dikici işbu mezbûr Ahmed esvâkda hilâf-ı emr-i âlî ve mugāyir-i nizâm-ı kadîm hufyeten sahtiyân iştirâ ve bey‘ etmekle nizâmımızın ihtilâline bâ‘is olmuşdur hatta bundan akdem İstanbul kādısı olan sa‘âdetlü semâhatlü Çelebizâde İsmail Âsım Efendi hazretleri huzûrlarında meclis-i şer‘de mezbûr Ahmed’den vech-i meşrûh üzere teşekkî eylediğimizde fîmâ-ba‘d sahtiyân bey‘ ve şirâsına müdâhale etmemek üzere tenbîh ve i‘lâm dahi olunmuşidi deyü min-külli’l-vücûh takrîrlerine mutâbık emr-i âlî ve i‘lâm-ı şer‘iyeler ibrâz ile yine mezbûrdan ba‘de’t-teşekkî ve’s-suâl mezbûr Ahmed fi’l-hakīka tâcir esnâfından olmadığını ve hilâf-ı emr-i âlî ve mugāyir-i nizâm-ı kadîm hufyeten sahtiyân bey‘ ve şirâ eylediğini ikrâr ve i‘tirâf etmeğin merkūm Ahmed hilâf-ı emr-i âlî harekete cür’et eylediği için husûs-ı mezkûre müdâhaleden yine men‘-i küllî ile men‘ olunduğu Mahkeme-i Bâb’dan huzûr-ı âlîlerine i‘lâm olundu. Fî 26 Rebî‘ülâhir sene 1163