Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 514 Hüküm no: 697 Orijinal metin no: [90b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Perşembe Pazarı fırını ustaları Kova ve Karaim’in, fırınlarında tablakâr olan Hüseyin b. Mehmed’in nizama aykırı olarak Fethiye fırınında çalışmaya teşebbüs etmesi üzerine sulh olup tekrar kendi fırınlarında çalışmaya râzı ettikleri Bâ-mühr-i hazret-i efendi Ma‘rûz Sahib-i arzuhâl habbâz tâifesinden Karagümrük’de Perşembe Pazarı fırını ustası Kova v. Novak ve şerîki Karaim nâm zimmîler meclis-i şer‘de habbâz tablakârlarından Hüseyin b. Mehmed muvâcehesinde kethudâları ve yiğitbaşıları ve Fethiye fırını ustası Mehmed Beşe b. Hasan hâzırûn oldukları hâlde ez-kadîm nizâmımız bir fırında tablakâr olan kimesne bey‘ eylediği nân-ı azîzin akçesini ustasıyla hesâblaşıp kat‘-ı alâka etmeyince âhar fırına tablakâr olmak memnû‘ olup ve işbu Hüseyin bizim tablakârımız iken henüz hesâbımızı görmeksizin Fethiye ustası işbu Mehmed Beşe’ye tablakâr olmak sadedinde olup ihtilâl-i nizâm-ı kadîmimize bâdî olmağla mezbûrdan teşekkî ve hesâbımızı görüp zimmetinde zuhûr eden hakkımızı taleb ve da‘vâ sadedinde olduğumuzda mezbûr Hüseyin Fethiye fırını ustasına tablakâr olmakdan fâriğ ve kemâ-fi’l-evvel bizim tablakârımız olmağla müte‘ahhid ve Fethiye fırını ustası dahi mezbûru tablakâr etmemek üzere müte‘ahhid olduklarında biz dahi mezbûru kemâ-kân tablakâr edip herbirimiz bu vechile râzı olup kat‘-ı nizâ‘ eyledik dediklerini mezbûr Hüseyin ve merkūm Usta Mehmed Beşe tasdîk edip kat‘-ı nizâ‘ eyledikleri huzûr-ı âlîlerine i‘lâm olundu. Fî 27 Rebî‘ülâhir sene 1163