Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 515 Hüküm no: 698 Orijinal metin no: [90b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Altıpoğaça mahallesi ahalisinin kendisinden şikayetçi oldukları Berber Mehmed b. Yakub’un beraber kaldıkları Ümmü Hatun ve çocuklarının başka mahalleye taşınma taahhüdünde bulunması üzerine sulh oldukları Ma‘rûz Ashâb-ı arzuhâl Altıpoğaça mahallesi imâmı Mehmed Efendi b. İbrahim ve müezzini el-Hâc Mehmed ve ahâlîsinden Mehmed Odabaşı ve diğer Mehmed Odabaşı ve Hasan Çelebi ve Abdi Çelebi ve el-Hâc İbrahim ve Hüseyin Çelebi ve Mehmed Çelebi ve Sahhâf Molla Mehmed ve Mustafa ve es-Seyyid el-Hâc Mehmed ve Hüseyin ve Veliyüddin ve İbrahim Çelebi ve Molla Mehmed ve sâirleri meclis-i şer‘-i enverde mahalle-i mezbûre sükkânından derûn-ı arzuhâlde mezkûrü’l-ism Berber Mehmed b. Yakub nâm kimesne muvâcehesinde mezbûr Berber Mehmed’den ve kendi ile menzilinde ma‘an sâkinler olan müste’ciresi Ümmü nâm hatun ile oğulları Mehmed ve Hüseyin ve er karındaşı Ali’den derûn-ı arzuhâlde mezkûr teşekkîmiz üzere bir vechile emniyet ve rahatımız olmamağla mezbûrûnun mahallemizden hurûclarını iltimâs eylediğimizde mezbûr Berber Mehmed dahi menzilinde müste’ciresi olan Ümmü Hatun’u ve oğulları mezbûrân Mehmed ve Hüseyin ile er karındaşı mezbûr Ali’yi menzilinden çıkarıp kendi dahi mahalle-i mezbûreden çıkıp ve âhar mahallede sâkin olmak üzere ta‘ahhüd eyledikde biz dahi râzılar olup bu vechile kat‘-ı nizâ‘ eyledik deyü olan takrîrlerini mezbûr Mehmed dahi tasdîk eylediği Mahkeme-i Bâb’dan huzûr-ı âlîlerine i‘lâm olundu. Fî 28 min-Rebî‘ülâhir sene 1163